Rumah Panjai Dingong deka digaga ba kandang endur baru

SIBU: Rumah Panjai Dingong Megang di Skim Palan Pengetap Berumah Baru, Sekuau ditu deka digaga ba kandang endur ke baru.

Kaban Kunsil Nengeri (ADUN) Tamin, Ir Christopher Gira madah, iya deka minta sepenyampau duit turu ari perintah nengeri kelimpah mega mantu peranak rumah panjai ba kandang menua nya ngerataka palan ba sitak ti diperambu dikena ngaga rumah panjai ke baru.

“Maya tu, kami ngemeratka ngagai juluk ngaga palan pengetap berumah sementara,” ku iya nengah penerang ti dianjung iya ba Facebook iya empu tadi.

Kena ke tumu pagi Hari Satu tu tadi, Rh Dingon Megong ti ngembuan 22 pintu angus diempa api.

Bisi lapan raban ari Opis Bomba enggau Penyelamat (BBP) Sungai Merah nengah bantu lima raban ari BBP Sibu dikangau ngagai palan rumah angus nya pengudah nerima kangau nyenyit pukul 3.26 pagi.

Tang, lebuh datai ba palan penyadi penusah angus rumah nya, rumah panjai satu ringat udah lengis angus.

Tang, nadai pekara ke enda disadang nyadi diripot ba penusah nya.

Berebak enggau nya, semua 123 iku sida ti tasah nya diengkah ba Palan Ngenduh Sementara Mutarka Penusah Nyenyit di Balai Mayuhguna Sekuau.

Nengah penerang ke sama, Gira madahka penyampau agu mensia mayuh ba palan ngenduh nya deka ditambah. Berebak enggau nya, iya mega minta Opis Pengintu Pengelantang Mensia Mayuh (JKM) ngambika seruran mantu meri barang perengkaguna nyengkaum barang pemakai sereta ai irup ngagai sida ti diau ba palan ngenduh sementara nya.

Gira ba awak nya mega meri terima kasih ngagai semua raban nyengkaum Gerempung Ukai Dikuasa Perintah (NGO) ti meri bantu mayuh macham bansa pemeri ngagai sida ke dituntung angus rumah.

Ku ya, entara NGO nya nyengkaum Gerempung Bansa Dayak Sarawak (SDNU) Sibu, Serakup Indu Dayak (SIDS) Sibu enggau Gerempung Dayak Sarawak (PEDAS).