Peranak Rh Dingon nerima bantu ari SDNU Sibu
SIBU: Penusah rumah angus ti nuntung lebih ari 100 iku peranak Rumah (Rh) Dingon Mengong ba Skim Sekuau Oya ditu, nerima bantu sereta penyinu ati ari bemacham pampang raban Gerempung Ukai Dikuasa Perintah (NGO).
Kemari, Serakup Dayak Sarawak (SDNU) Sibu ti sinuka nasit sida ke tasah laban penusah rumah angus tu datai meri bantu ba Dewan Mayuhguna
Sekuau alai peranak Rh Dingon ngenduh, bedau lama udah.
Bantu ke diberi kaban SDNU iya nya barang perengkaguna, ke disuaka Chairman SDNU Sibu Chambai begulai enggau raban iya ke bukai lebuh ti ngabas sida ke tasah.
Ku Chambai, raban iya endang siru sereta sinuka penusah ti nuntung peranak Rh Dingon.
“Kami seruran betatika penusah ke nyadi ba rayat ba menua tu sereta mantu sida enggau nangka ulih.
“Ngarapka nengah bantu tu ulih ngelempungka mimit penusah ke ditapi sida,” ku iya madah ngagai pengarang berita, kemari.
Ngenangka penusah ti nyadi ba Rh Dingon, kena Hari Satu empai lama rumah panjai tu ke panjai 22 pintu u dah lengis angus.
Nitihku padah pengari ari Palan Bejalaika Operasyen Bomba (PGO) Sarawak, raban iya nerima berita ngenyit ti bekaul enggau penusah rumah angus tu urung pukul 3.26 pagi.
Berindik ari nya, lapan iku raban ari Balai Bomba enggau Penyelamat (BBP) Sungai Merah lalu dibantu raban bomba ari BBP Sibu dianjung ngagai palan angus tu ngambi mantu.
Lebuh sida datai ba palan penusah tu, rumah panjai nya udah lengis angus 100 peratus.
Taja pia, semua peranak Rh Dingon nya selamat lalu nadai kes bebadi nyawa diripotka.