Pekit lumba, main di sekula ulih nempa kerejasama entara nembiak
MARUDI: Pekit lumba enggau main ti diatur ba renggat sekula iya nya mai tuju dalam nempa kerejasama entara raban nembiak ti ukai semina nya pekit aja.
Kaban Parlimen (MP) Miri Dr Micheal Teo madahka pengerami lumba enggau main nya mega ulih mantu ngangkatka pengeransing ati, kredibiliti sereta inovasyen dalam nembiak.
“Elemen tu endang beguna laban nya ulih meransang pengelandik enggau tikas pengulih runding dalam ngangkatka pemanah ulah nembiak, ngambika ulih nyulut sereta bisi kualiti.
“Pekit lumba enggau main nya udah tentu siti ari pengawa sekula dalam meri pelajar ti bekualiti ngagai tetiap nembiak, ngambika sida ulih meri empas ti manah berapa kali lipat dalam bidang pelajar,” ku iya.
Dr Teo madah munyi nya lebuh ti bejaku maya bejadi Kejohanan Majlis Sukan Sekolah-sekolah Rendah (MSSR) Pelilih Baram kali ke-37 taun, ti diatur ba
Mini Stadium Marudi, ditu kemari.
Teks iya udah dibacha Chairman PKR Baram Roland Engan.
Ku Dr Teo nambah agi, elemen lumba enggau main endang dikemerat ari mayuh raban ungkup pemansang modal mensia sereta kaul ari sukut runding, batang tubuh enggau jalai pengarap ti deka nempa modal mensia ke holistik.
“Beserimbai enggau nya aku mega ngarapka apai indai ulih meri sukung ngagai anak sida ngambika terus nyereta dalam aktiviti ti bepengerai bansa tu, kelebih agi dalam aktiviti kokurikulum ti ulih mantu nembiak nempa penyulut sida kediri,” ku iya nambah.
Ba pengerami ti sama mega, Roland udah madahka geran sepenyampau RM5,000 ari Dr Teo nengah agih belanja Projek Mit Menua Pesisir (MRP) lalu RM2,000 ari Gerempung Pewaris Bagi Menua Miri ti betuaika iya.
Pekit lumba enggau main MSSR entara zon sekalitu disereta urung 556 iku atlit ari 68 buah sekula primari ke mega semua nya ngarika lima zon iya nya Zon TutohApoh, Zon Tinjar, Zon Baram Hilir, Zon Baram Hulu enggau Zon Baram Tengah.
Ungkup pekit bebaris entara Zon, udah mandangka Baram Tengah udah nyadi champion, lalu kontinjen Baram Hilir ba penuduk lumur dua sereta lumur tiga dipenggi Zon Baram Hulu.
Sama bisi datai ba pengerami nya Sapit Pemesai Pelajar Pelilih Baram James Valley Harry sereta Chairman Gerempung Kepala Pengajar Baram Samuel Iwat.