Perintah Besai dipinta ngemeratka isu sebun asap di Kuala Baram

MIRI: Perintah Besai dipinta meri perati enggau berat bekaul enggau isu sebun asap ti nuntung selapur Kuala Baram 2 sepanjai taun sesi sekula.

Nitihka Kepala Pengajar Sekula Primari (SK) Kuala Baram 2 Mohammad Kindang ngarap Kaban Parlimen (MP) Miri Dr Michael Teo ulih ngenataika isu nya ngagai Parlimen sereta bejuraika enggau minta perati ari raban menteri ti bekaul.

"Tetiap taun maya musim angat , kami tusah ati sereta irau bekaul enggau sebun asap ti deka ngelekai semak SK Kuala Baram 2, kelebih agi enti bekaul enggau pengerai bala pengajar sereta nembiak sekula," ku Mohammad lebuh bejaku ba pengerami Taun Baru China ti diatur ba palan sekula tadi.

Nitihku Mohammad, raban sekula amat ngarapka pengari rayat kitai, Dr Michael Teo, ulih ngenataika isu tu ngagai Parlimen, bejuraika isu tu sereta ngiga chara mutarka nya.

Sama bisi datai chairman Gerempung Apai Indai enggau Pengajar (PIBG), Siti Khadijah Mohammed Salleh sereta Penulung Kanan Pemesai Tadbir Saili Sait.

Dr Teo ba jaku iya ngelalau nembiak enggau apai indai ngemeratka bekaul enggau pengelengkai igi penyakit Karonavirus (COVID-19), seruran nyaga pemeresi diri, masu jari, ngena sengkabung idung enggau mulut maya batuk tauka engkasi.

Enti nyema nuan ngasaika diri tabin sereta pedih rekung, anang datai ke sekula, tang betemu enggau lutur jampat, ku iya nyemetak.

Nitih atur ari lutur, enti nuan deka dikuarantin sereta nagang diri begempuru enggau bala bakih sereta bala sebilik, sapa ti dirampit, dikena nagang ari igi penyakit nya ngelekai, ku iya nambah.

Nyentuka diatu, pengelengkai igi penyakit nya bedau agi ulih diputarka.

Nyadika penambah, Dr Teo mega bejalaika pengawa ngabas ngagai endur ngelingi sekula dikena mansik baru perengkaguna sereta fasiliti sekula ti deka diangkatmanah dikena nyapai peminta nembiak ti majak nambah.

Ba awak tu, sekula nya nampung lebih ari 560 nembiak, nyengkaum nembiak ari kelas pelajar khas ti dibuka taun nyin tadi.

Kepala Pengajar mega ngarapka infrastruktur sekula diangkatmanah laban sida deka nyendiaka gaya kondusif ungkup nembiak belajar.

Ba pengerami nya, Dr Teo mega meri agih belanja sepenyampau RM5,000 ngagai Gerempung Apai Indai enggau Pengajar (PIBG) sekula.