Pengarang berita mesti nitihka undang-undang lebuh ngaga berita ke pemaik komuniti
SIBU: Temenggong Datuk Vincent Lau Lee Ming ngelalau bala pengarang berita ngambika seruran nitihka undang-undang ke pemaik mensia mayuh.
Bejaku ba Pengerami Merarau Ngintu Taun Baru China ti diatur Institut Pengarang Berita Rejang (IRJ) kemari, iya madahka pekara tu kelebih agi bekaul enggau resia sapa orang ti ditanya sida lebuh ti ngaga berita.
Lau nemu iya nya aspek pangku pengawa pengarang berita enda mekuh ngagai sebarang undang-undang tang nya endang beguna ngagai sida ngambika nitihka undang-undang.
“Bala pengarang berita patut ngembuan pengeransing ati meri penerang ti betul sereta enda bechiping bekaul pekara ti dipeda sida.
“Etika media sereta tanggungpengawa rama patut seruran dikemerat. Penerang baka ti bekaul enggau penemu iya nya siti kuasa,” ku iya nerang.
Bejaku bekaul enggau pengerembai berita pelesu Covid-19, Lau nemu mayuh tajuk berita ti kurang betul dikunsika ba media rama.
“Ngarapka semua orang ti datai ditu seharitu (kemari) deka beratika tanya tu nama tanggungpengawa ti patut digaga nengah platform media ungkup isu pengerembai berita pelesu tu?,” ku iya.
Beserimbai enggau nya, Lau ngarapka IRJ deka terus ngatur pengerami bansa nya dikena ngenegapka pengelantang raban bansa sereta penyerakup bala pengarang berita ti enda ngira bida adat enggau jalai pengarap sida.
“Kami ngarapka nengah pengawa ngintu pengerami bansa tu, pengarang berita ari semua bansa deka begempung lalu nyadika nya sebagi ari komuniti pupu bansa di nengeri tu,” ku iya nambah.
Pengerami nya dirichahka enggau pemerindang, nyabut tikit benasit, meri ‘angpau’ ngagai kaban IRJ sereta ruang bilik sida.
Sama bisi datai iya nya Presiden IRJ Monica Chua sereta raban ti meri sukung ari sukut belanja.