Nembiak, pengajar enggau staf SMK Julau No.2 udah ngulu program ‘Fire/Emergency Evacuation Drill’
BINTANGOR: Bisi 600 iku nembiak Sekula Sekondari (SMK) Julau No.2 enggau pengajar sereta staf sekula nya udah nyereta program ‘Fire/Emergency Evacuation Drill’ ti diatur ba sekula nya empu.
Ketuai Opis BOmba enggau Penyelamat Malaysia Bintangor Nicholas Belulin madah, program nya siti ari chara raban Bomba dalam meri pelajar tumu ngagai komuniti bekaul chara ti patut digaga lebuh ti betapi enggau penusah ngenyit baka penusah angus.
“Berindik ari raban nembiak sekula kelebih agi ti diau ba buding iya nya raban ti ngembuan risiko betapi enggau penusah ngenyit bansa nya, nya alai kami udah ngambi inisiatif tumu meri penemu ngagai sida bekaul chara ti patut digaga lebuh ti dituntung penusah baka tu.
“Berebak enggau nya mega kitai deka meri penemu ngagai raban tu bekaul lumur telefon ungkup penusah ngenyit baka tu ukai nya lumur ti ulih ditelefon sepeneka ati sereta nyadika main ngagai sida, laban pengawa bansa tu salah ari atur undang-undang nyema digaga sepeneka ati.
“Kami pechaya iya nya, nengah aktiviti baka tu deka meri pelajar tumu ngagai raban tu bekaul pekara ti patut digaga sida nyema sida betapi enggau penusah ngenyit, kelebih agi bekaul enggau pengawa nyelamatka diri,” ku iya.
Nicholas madah munyi nya ba program ‘Fire/Emergency
Evacuation Drill’ di SMK Julau No 2, kemari.
Ba latih nyelamatka diri, bala nembiak udah diberi penemu bekaul enggau latih ngetu, rebah enggau guling, chara pansut ari begunan lebuh ti nyadi penusah ngenyit sereta chara ngena kereban madamka api enggau betul bepelasarka gaya penusah ti ditapi.
Batang tuju program tu diatur iya nya dikena nambahka penemu sereta pemereti ati ba raban nembiak enggau pengajar bekaul pemerat sentang penemu pemun chara nyeliahka penusah angus sereta bakani deka nyelamatka diri lebuh ti dituntung penusah ngenyit.
Nengah program bansa nya, tu ulih ngurangka risiko sida betapi enggau penusah angus laban udah nemu sentang atur pengelikun ke patut digaga lebuh betapi enggau penusah nya.