5,000 unit ‘myFreeview’ disadung ba Kuching berengkah 15-18 Februari tu

KUCHING: Bisi 5,000 unit dekoder ti enda bebayar ‘myFreeview’ disadung di mengeri besai tu dalam timpuh empat hari (15-18 Februari) ba dua palan bebeli barang ditu.

Sapit Menteri Dagang Dalam Nengeri enggau Pekara Penguna, Chong Chieng Jen madahka ba hari keterubah pengawa nyadung dekoder nya kemari bejalai enggau manah.

Ku iya, program nya diatur begulai enggau tim MyTV ke datai ke Sarawak lalu nyadung dekoder ti enda bebayar ‘myFreeview’ ngagai penerima Bantuan Sara Hidup (BSH).

“Sukung ari mensia mayuh ditu chukup manah, tu pengawa ti dipejalai perintah Pakatan Harapan.

“Aku meri terima kasih ngagai Aeroville ti udah ngemendarka kitai ngena alai tu endur nyadung dekoder sehari tu (kemari) enggau pagila (sehari tu). Udah tu kitai deka bepalan ba Emart Batu Kawa Hari Isnin enggau Selasa (17-18 Februari).

“Dalam timpuh empat hari tu bisi 5,000 unit dekoder ti enda bebayar tu deka disadung ngagai orang ke patut di mengeri besai tu (Kuching),” ku iya lebuh dikerandau raban pengarang berita pengudah meda atur pengawa nyadung dekoder ti enda bebayar ‘myFreeview’ ti diatur ba Aeroville Mall ditu, kemari.

Raban B40 enggau Raban Timpang Pendiau (OKU) ke patut sereta berejista di nengeri tu diperansang ngambi dekoder nya ba palan ke semak ti diatur berenggat.

Kelimpah ari di mengeri besai Kuching, palan penyadung dekoder ti enda bebayar ‘myFreeview’ dibuka ba Miri (26-28 Februari) sereta di Time Square Mall, Bintulu (1-2 Mac) enggau SMK Nangka Sibu (7-8 Mac) tu, ari pukul 9 pagi ngagai 4.30 lemai.

Berindik enggau pekara tu, mensia mayuh dilalau mai kad pengelala dikena ngesahka.

Sebarang penerang silik tau dipeda ba www.myFreeview.tv tauka telefon ngagai Pusat Khidmat Pelanggan MYTV ba lumur 1-800-18-1088 tauka 1-300-80-6988 ari pukul 8 pagi ngagai 10 malam tiap hari nyengkaum maya kemisi hari besai.

Peminta set dekoder ti enda bebayar ngagai raban B40 ke patut mega ulih dipinta nengah emel ke digital@mcmc. gov.my.

Nyempulang Chong kemari, Kaban Kunsil Nengeri Pending Violet Yong.

DEDAT: Mensia mayuh bebaris ngechek sereta ngesahka diri ulih tauka enda nerima dekoder ti enda bebayar ‘myFreeview’ ti diatur ba Aeroville Mall ditu, kemari.

TERIMA KASIH: Siku ari mensia mayuh ke patut nerima dekoder ti enda bebayar‘myFreeview’ti disuaka pengari MyTv, ba pengawa nyuaka dekoder ti diatur ba Aeroville Mall ditu, kemari.