50 unit rumah RSP fasa keterubah di Bau udah dipenyadi kemari
BAU: Fasa keterubah Projek Rumah Spektra Permata (RSP) ti ngaga 50 unit rumah di Sibuluh dalam pelilih menua tu udah dipenyadi kemari.
Pengerami bejadi nya dipenyadi Menteri Muda Pengawa Berumah enggau Pengerai Mensia mayuh, Dr Annuar Rapaee ba Dataran Bau ditu.
Lebuh bejaku ba pengerami nya, Dr Annuar madahka projek RSP tu iya nya inisiatif Kepala Menteri Datuk Patinggi Abang Johari Tun Openg.
Tuju nya ungkup raban kurang penatai pemisi sereta ngambika lebih mayuh rayat ngembuan rumah kediri empu.
“Kepala Menteri ba bulan Januari 2019 madah perintah nengeri deka ngaga 2,500 unit RSP dalam timpuh dua taun nyengkaum 164 unit di Bau.
“Diatu, kitai dalam proses ngaga 1,383 unit enggau ungkup Bau, sepenyampau 50 unit deka digaga ba fasa keterubah ari 164 unit ti diungkup ngagai Bau,” ku iya.
Kelimpah ari nya, Ketua Pegawai Eksekutif Perbadanan Pembangunan Perumahan sarawak (HDC), Mohamad asman Ahmad madahka unit Rsp tu iya nya bansa setingkat enggau pemesai 750 kaki persegi.
Rumah tu bisi tiga pangking enggau dua bilik ai lalu siti alai makai ti dijual ngena rega RM120,000 seunit ke baruh.
Orang ke ulih minta tu iya nya, rumah tu ungkup ruang bilik bepenatai pemisi baruh ari RM6,000 sebulan enggau nadai enda ngira bagi reta tanah atas nama orang ke minta.
Bekaul enggau atur nginjau, orang ke minta ti bulih rumah tu ulih ngaga peminta nyali duit ari Mutiara Mortgage & Credit Sdn Bhd.
Nambahka nya entara projek RSP ke udah tembu iya nya projek ba Bunga Rampai dalam kandang menua Bau.
Projek tu mungkur pengawa ngaga 122 unit rumah enggau udah tembu kena 14 Oktober 2019 enggau penyampau semua ungkus belanja RM21,990,098.77.
Kelimpah ari nya, RSP Sematan ti mungkur pengawa ngaga 25 unit rumah ti dipelaba tembu ba kena 15 Julai 2020 enggau ungkus belanja RM3,986,361.05.
Bisi datai ba pengerami nya, Kaban Kunsil Nengeri (ADUN) Tasik Biru, Dato Henry Harry Jinep sereta Pemesai Pelilih Bau, Anielia Siam.