JPVM ngelangkar strategi baru dikena meri vaksin ngagai ukui siga
KUCHING: Opis Servis Veteriner Malaysia (JPVM) ngelanggur deka ngaga strategi baru dikena meri vaksin ngagai ukui siga.
Ketuai Direktor Opis nya, Datuk Dr Quaza Nizamuddin Hassan Nizam madah, sida deka meri ukui siga nya umpan ti diberi vaksin.
Iya madah munyi nya maya nemuai meri basa ngagai Sapit Kepala Menteri Datuk Amar Douglas Uggah ba opis iya ditu, kemari.
“Kami deka ngena chara tu ba palan endur ti mayuh ukui enggau kandang endur ti mar diabas dalam operasyen anti-rabies ti benung dipejalaika diatu.
“Nya deka dikena enggau strategi ke bisi lalu kami udah dalam proses meli umpan vaksin tu,” ku iya.
“Udahnya kami deka ngaga pansik dikena meda empas ari nya sereta baka ni nya ulih ngeruga imunisasi ukui enggau ke bukai,” ku iya seraya nambah Sarawak nagang rabies enggau manah.
Iya mega meri jamin ke alai opis iya meruan meri sukung ba pengawa nagang rabies tu.
Berebak enggau nya, Dr Quanza muji perambu ti terus dipejalaika perintah dikena ngangkatka populasyen chapi enggau agresif nyadika chara dikena ngangkatka pengeluar dagin chapi.
Iya mandangka chara nya nyadi chara ti dikena mansang ke mua.
Ba pekara tu, Uggah ke mega Menteri Betanam Betupi Moden, Tanah Adat enggau Pemansang Kandang Menua udah nerangka sentang perambu nya.
“Sarawak ngembuan tanah ti besai lalu seruran bisi peminta tinggi ba dagin.
“Sarawak mega nadai penyakit Jari, Kaki enggau Mulut (HFMD),” ku Uggah.
Nya alai ku iya, sida deka minta kuasa ari pemansang tanah baka SALCRA enggau kompeni minyak besai baka Ta Ann, Rimbunan Hijau enggau DAFA dikena integrasyen nupi jelu ba ladang sida.
Iya madah SALCRA udah ngadu perambu nya urung 3,000 iku chapi ba sekeda ladang nya.
“Penyampau dijangka iya nya ngasilka 1,000 iku anak chapi setaun lalu kami ngelanggur deka magi ngagai sida ti rindu ba pengawa tu,” ku iya.
Berebak enggau nya, nitihka Dr. Quaza menua dipelabaka napi penusah ti besai ba pengawa ngeluarka dagin chapi kena taun 2035.
“Kitai nadai ngembuan populasyen orang nupi maya diatu.
“Nya perlu nyadi pekara dikemerat menua laban diatu Malaysia semina ngeluarka 50,000 tang ngimport 150,000 tan metric dagin lembu tiap taun,” ku iya.
Iya madah opis iya udah merambu tiga model ngagai kompeni besai ti nanam kelapa sawit.
“Keterubah, kami merambu ke alai sida ngelakka sekeda tanah sida nyadi palan nupi chapi lalu nupi nya kediri.
“Kedua, sida ulih bekerejasama enggau orang ti landik lalu nyuwa tanah sida ngagai orang ti nupi ti ulih ngereja nya enggau sistematik sereta dipatau opis,” ku iya.
Ku iya, sida merambu deka meri ‘rebat’, insentif chukai enggau ke bukai dikena meri peransang ngagai kompeni nya.
Sentang ba pekara penyakit African Swine Fever (ASF), Dr Quaza madah, beguna amat sida terus bejalaika pengawa matau enggau bejejaga dikena ngetuka pengelekai penyakit nya ba nengeri tu.
Dr Quanza deka pinchin enda lama agi pengudah bejalaika servis pengelama lebih 36 taun.
Dr Quanza disempulangka Direktor Veterinar Sarawak, Dr Adrian Susin enggau sapit iya Dr Stephen Gabriel maya penemuai nya.