Alice mujur nyuaka termometer ngagai 34 buah sekula primari di Lanang
SIBU: Sepenyampau 34 buah sekula primari (SK) ba pelilih Parlimen Lanang udah nerima termometer ari Kaban Parlimen (MP) Lanang Alice Lau dikena mantu meresa pengangat tubuh nembiak sekula.
Nitihka Alice lebuh ba pengawa aum media ba ditu ensanus, iya bisi ninga ba sekeda sekula enggau populasyen nembiak ke besai agi ari pelilih ti dipegai iya, apin ngembuan termometer ke chukup dikena bejalaika ba tuju nya.
Nya alai, iya meli sepenyampau 60 iti termometer besereta enggau inframirah ngagai 34 buah sekula primari ti ngembuan nembiak sekula pemadu mayuh.
Berebak enggau nya, Alice ngansak raban sekula ti nerima bantu tu ngambika meresa pengangat tubuh nembiak dulu sebedau sida tama ngagai bilik belajar, tu mega siti ari atur pengawa dikena bejejaga ari pengelekai penyakit Covid-19.
“Kitai semua udah ninga bekaul enggau kes ti udah nyadi ba sekula di Kuching, siti kelas nembiak sekula nya dikuarantinka. Dikena nagang penusah tu ari nyadi ba Sibu kelebih agi ba sitak ti dipegai aku, nya kebuah aku meli lalu meri termometer tu dikena meresa tikas pengangat tubuh bala nembiak.
“Chara ngena termometer tu enda mar diatur laban nya enda betegu enggau kulit tubuh. Tikas pengangat tubuh ulih diambi entara penyauh 15mm enggau 50mm. Enti sema siku nembiak nya bisi ditemu sakit chelap angat, termometer ke ngembuan inframirah tu deka bebunyi enam kali.
“Nyadi, kita nemu nembiak sekula nya patut dibai pulai ke rumah ngambika enda ngerampit nembiak bukai. Kebendar iya, ke ditemu aku semua sekula udah bisi termometer kediri empu tang apin chukup,” ku iya nambah.
Nangkanka nya, ku iya SK SEDC semina bisi siti aja termometer lalu SK Perbandaran No.4 enggau SJKC Thian Hua bela bisi dua iti termometer.
“Nyadi, penyampau maksimum termometer ke ulih diberi aku ngagai sekula iya nya SK Sibu Jaya ti ngembuan 1,900 iku nembiak sekula. Sekula ke bukai baka SK SEDC, SK Perbandaran No.4 enggau SJKC Thian Hua, aku deka meri tiga iti lalu ungkup sekula ba menua pesisir aku deka meri siti,” ku Alice.
Ari tuju enggau bantu tu tadi, iya ngarapka sekula ti bulih termometer nya ulih ngena perengkaguna tu enggau memanah.
Berindik ari nya, Alice ngelalau mensia mayuh ngambika seruran nyaga pemeresi diri empu baka suah nuchi jari, makai pemakai ti dipanduk enggau mansau sereta ngelaungka diri empu ari palan ti dedat enggau mensia.