Peranak di menua pesisir randaka servis internet ti manah
MIRI: Peminta ba menara telekomunikasyen kelebih agi di kandang menua pesisir dipeda beguna bendar dalam mantu ngangkatka pengelaju servis internet ke bisi, pia ku Kaban Parlimen (MP) Sibuti Lukanisman Awang Sauni.
Ku iya, pengawa nya entara siti chara sida deka ngangkatka servis telekomunikasyen ke suah bnyadi isu komuniti kelebih agi ba sitak konstituensyen iya lalu iya nemu pemesai guna servis nya.
“Enti peneras internet betambah manah, nyadi komunikasyen mega ulih jampat sereta ngemudahka semua utai ti diperambu ungkup pemansang ari sukut semua pekara ditu,” ku iya.
Lukanisman madah munyi nya ba program beripai ngechat rumah panjai Jumat di Bukit Kisi, Peninjau ditu bedau lama ti udah.
Nerang silik agi, inisiatif ungkup menara telekomunikasyen nya ku iya sebagi ari pengawa perintah nengeri dekaka serata Sarawak ulih akses internet penuh kena taun 2025 nengah Sarawak Multimedia Authority (SMA) ti deka ngaga 300 menara telekomunikasyen kelebih agi ba kandang menua pesisir ari baruh Strategi Ekonomi Digital Sarawak 2018-2022.
Sentang program pengawa beripai di rumah panjai Jumat, Lukisman madah program nya dipelanja nengah geran ari palan servis iya dikena mekal chat enggau ke guna bukai nyengkaum langsir ti dipinta gerempung indu rumah panjai nya.
“Pengawa ngechat nya deka terus digaga nyentukka tembu enggau aku empu enda sabar deka meda asil nya ila.
“Dikearap nengah pengawa ti bansa tu, nya ulih nempa gaya baru sereta manah di rumah panjai tu,” ku iya.
Ba program nya, Lukanisman mega bisi nerangka ngagai peranak rumah panjai nya sentang insentif ti disediaka nengeri iya nya Kenyalang Gold Card (KGC), bantu RM450 ngagai indai ti beranak, insentif RM1,000 ungkup nembiak mit baru ada ti dikelala Endowment Fund (EF), Insentif tiket pulai mansang maya hari besai ungkup nembiak Sarawak sepenyampau RM600, Bantu Khas
Pesakit Tungkul Sengayuh enggau Bantu Pemati (BIK) sepenyampau RM3,000.
Ku Lukanisman nambah, iya udah bejalaika projek pemansang atap awning ungkup dua buah rumah panjai di Bukit Kisi iya nya rumah panjai Jumat enggau Busang sereta bisi mega bulih peminta bukai ti dipejalaika enggau chara berenggat.