GPS patut meri kerejasama ngagai perintah besai ke pemaik rayat
KUCHING: Chairman Pakatan Harapan (PH) Sarawak Chong Chieng Jen madah perintah Gabungan Parti Sarawak (GPS) ngemeranka ‘politik buli’ ti ulih meri pemerinsa ngagai rayat.
Sapit Menteri Dagang Dalam Nengeri enggau Pekara Penguna nya madahka, nya berindik ari perintah GPS ti enda meri kerejasama ngagai pengawa ti dipejalaika perintah besai ke meri penguntung ngagai rayat.
Baka ba Miri ku Chong, surat minta pemendar deka ngena Dewan Suarah ngagai perintah nengeri udah dianjung, alai ngatur pengawa nyadung dekoder enda bebayar ‘myFreeview’ ujung bulan Februari tu, enda dikemendarka taja pan dulu ari nya udah dikemendar.
“Aku ngasaika nyadi sebuah perintah nengeri, tu ulah enggau pendiau ti enda manah, laban pengeran kami (perintah PH) deka nyadung dekoder tv tu iya nya meri penguntung ngagai rayat.
“Tu ukai semina nunjukka perintah nengeri Sarawak enda ngemeratka guna rayat tang ngemeratka agenda politik sida. Nyadi perintah enda patut ngereja pengawa baka nya.
“Aku minta GPS ngambika beratika pekara nya entara sida lalu ngetuka semua diskriminasyen, ngaga baka nya (persecute) semina ketegal semua program tu dipejalaika perintah besai. Nagang rayat nerima penguntung ari perintah besai,” ku iya.
Chong ti nyadi Chairman Parti Tindakan Demokratik (DAP) Sarawak mansutka pekara nya lebuh dikerandau raban pengarang berita nyerumba iya datai ba pengawa nyadung dekoder enda bebayar myFreeview diatur ba palan bebeli barang ditu, kemari.
“GPS, nama utai ti dikemeranka sida iya nya ‘politik buli’, ti ulih ngemediska rayat,” ku iya.
Nitihku Chong, pekara bekaul enggau meri dekoder MyTV diatur perintah besai Barisan Nasional (BN), ke alai ungkup Sabah enggau Sarawak dikirum ngena ‘courier’.
Tang ku iya, dikirum ngena ‘courier’ nya bisi enda datai ba rayat laban nama palan endur diau enda penuh ti ngujungka dekoder ditikal pulai.
“Tu inisiatif sida (perintah ke dulu suba) ti semina dikirumka ngena ‘courier’ lalu mayuh enda datai ba rayat, pengudah (nyadi perintah) kami bebendar berunding enggau kompeni ti dichirika sida (perintah dulu suba) lalu ngaga semaya ngambika sida ngajung tim nyadung dekoder tu enggau nadai bebayar.
“Ngena surat semaya pengawa ke dulu, aku ngasaika bisi nyiping orang Sarawak, nya kebuah kami berunding enggau MyTV sereta sida iya besetuju enggau perambu kami deka nganjung tim ke mengeri besai di Sarawak iya nya Kuching, Sibu, Miri enggau Bintulu nyadung dekoder tu.
“Perintah nengeri nadai meri sebarang pengelantang enggau kerejasama ba pengawa nyadung tu, sida perintah BN maya nya, udah nya kami beratka rayat sereta sida nguji ngenusah kami ti deka mantu rayat di Sarawak. Enda patut amat, nya kebuah aku madah ‘politik buli’,” ku iya.
Berindik ari pekara nya Chong madah sida deka nempa kerejasama enggau peribit seagi perintah nengeri enda meri kerejasama ngagai program enggau inisiatif perintah besai.
“Kami deka ngena palan baka palan bebeli barang. Palan bebeli barang asai aku manah agi endur ngatur program ti baka tu (nyadung dekoder tv),” ku iya.
Nyempulang Chong kemari, Kaban Kunsil Nengeri (ADUN) Pending Violet Yong.