Kes positif COVID-19 di Sarawak ‘stabil’
Rayat diperansang nitihka atur ti ditetapka ari baruh PKP dikena nagang pengelekai COVID-19
KUCHING: Dalam timpuh sembilan hari (18-26 Mac) Atur Nagang Pemindah (PKP) dipejalaika, Sarawak ngayanka kes positif COVID-19 ti ‘stabil’.
Kepala Menteri Datuk Patinggi Abang Johari Tun Openg madahka, berindik ari nya minta sereta meransang rayat ngambika terus nitihka atur ditetapka ari baruh PKP nya, kena nagang pengerekai COVID-19.
“Kenyau ari PKP dipejalaika kena 18 Mac nyentuk sehari tu (kemari), ‘trend’ berampit COVID-19 (kes positif) di Sarawak stabil, nya alai aku minta sereta meransang semua rayat Sarawak ngambi terus nitihka pekara ditetapka nengah PKP sereta diau di rumah,” ku iya.
Abang Johari madahka pekara nya ba aum pengarang berita pengudah aum Komiti Pengelikun Nengeri ti diatur ba Bilik Baum Besai, Ringkat 2, Wisma Bapa Malaysia ditu, kemari.
Ku iya, maya PKP berengkah dipejalaika rampit positif bisi tinggi iya nya 10 kes dirikodka kena 21 Mac tang udah nya penyampau kes positif nurun ngagai lapan (22 Mac), enam (23 Mac), lima (24 Mac), empat (25 Mac) enggau sehari tu (kemari) mega empat.
“Reti nya penyampau rampit positif COVID-19 diatu ngayanka trend stabil, lalu enti terus nitihka Atur Nagang Pemindah dipelaba engka bisi pengudah 14 hari (keterubah PKP) penyampau ke dirampit deka nurun.. sehari tu (kemari) hari ke semilan.
“Batang tuju kitai iya nya ngerikodka penyampau kusung ba kes positif COVID-19 enti enda pan ba hari ke-14, engka ba hari ke- 16 tauka ke-17,” ku iya.
Dulu ari nya Abang Johari madahka Sarawak deka naka ulih mulaika pemanah nengeri ari sukut pengelikun ketegal pengelekai COVID19 nengah chara neritka Atur Nagang Pemindah (PKP) ti
dilanjarka ngagai 14 April.
“Pemutus ke digaga maya baum iya nya berindik ari PKP dilanjarka 14 hari agi iya nya nyentuk 14 April, aku minta kerejasama ari semua rayat Sarawak ngambi nitihka PKP, terus diau di rumah.
“Nyema kitai beradat nitihka PKP nya, engka manah agi iya nya kitai ulih nagang COVID-19 laban kitai kediri ari Semenanjung Malaysia ti diserara Laut China Selatan nya meri pengelebih ngagai kitai ngetuka retayan rampit penyakit nya.
Ensanus, Menteri Besai Tan Sri Muhyiddin Yassin madah PKP deka dilanjarka ngagai 14 April 2020 dikena nagang pengelekai COVID19 di menua tu.
Sebedau tu timpuh keterubah PKP iya nya 18- 31 Mac 2020.
Nyempulang iya ba aum pengarang berita, Sapit Kepala Menteri ti mega Chairman Komiti Mutarka Penusah Ngenyit Nengeri Sarawak Datuk Amar Douglas Uggah Embas, Sapit Kepala Menteri Tan Sri Datuk Amar James Jemut Masing enggau Datuk Amar Awang Tengah Ali Hasan, Menteri Kaunsil Kandang Menua enggau Pengawa Berumah Dato Sri Dr Sim Kui Hian enggau ke bukai.
“
Kenyau ari PKP dipejalaika kena 18 Mac nyentuk sehari tu (kemari), ‘trend’ berampit COVID-19 (kes positif ) di Sarawak stabil, nya alai aku minta sereta meransang semua rayat Sarawak ngambi terus nitihka pekara ditetapka nengah
” PKP sereta diau di rumah.
Datuk Patinggi Abang Johari Tun Openg
Kepala Menteri