Perundingka silik ‘Pendapatan Minimum Terjamin’ ungkup raban B40: Madeline

KUCHING: Felo Akademi Sains Malaysia Dr Madeline Berma meri langgur penemu ngambika perintah meri urung RM1,000 ngagai sebuah ruang bilik dikena ngelempungka tating belanja sida ti putus jalai penatai pemisi berindik ari timpuh Atur Nagang Pemindah (PKP).

Kelimpah ari nya, iya mega meri langgur penemu ngambika perintah meri jali mikro nadai bungai, nadai chengkeram sereta dibayar pulai enti ekonomi ruang bilik nya pulai manah baru.

“Aku mega meri langgur penemu ngagai perintah ngambika berunding silik sentang ‘Pendapatan Minimum Terjamin’ (nyauka sebaka enggau konsep Universal Basic Income) ungkup raban B40,” ku iya nengah penerang ti ditulis ba Facebook iya,kemari.

Ku Madeline, perintah enggau Gerempung Ukai Dikuasa Perintah (NGO) enggau mensia mayuh dikearap ulih meri bantu ngagai raban ke pemadu di baruh.

Ku iya, berindik ari pengawa ngelanjarka PKP nyentuk 14 April, nya deka meri em pas ke besai ngagai raban ke bepenatai pemisi mit.

Ku iya, tebal agi ke bepenatai pemisi mit nya nerima gaji ninting hari, enda tegap sereta kurang duit galau.

“Sida chakah gawa nyadi orang ke bedaja, pekereja ba sektor enda formal, ibu tunggal, orang dagang mit, kereja begaji hari.

“Pansik aku beratika di Malaysia “income share” raban B40 urung 16 peratus,” ku iya nyemetak.

Taja pia, pekara ti balat ngirauka ati iya nya orang ke dalam ranam dua peratus ke pemadu di baruh.

Ku Madeline, dikesemaka baka “kair pagi empa pagi, kair lemai empa lemai”.

Tebala gi orang ke bedaja ba sektor enda formal, timpang pendiau,raban orang lunggat umur enggau nadai duit pinchin sereta sakit.

“PKP tu tentu deka ngeruga penatai pemisi enggau pengelantang pengidup sida.

“Sida udah nadai “chara dikena ngair pagi, tauka lemai”,” ku iya.

Madeline sekali agi madahka mensia mayuh ti putus jalai penatai pemisi deka ngena duit taruh sida.

“Ngagai ti nadai duit galau, chara beridup semina nengah chara berutang lalu nya deka nambahka utang ruang bilik nya ba maya ke diatu.

“Aku mega ng arapka perintah meri terus bantu belanja ke patut dalam timpuh PKP tu,” ku iya.