Gerija Anglika deka ngatur sembiang nengah chara online enggau ‘live-streaming’
KUCHING: Gerija Anglika di Sarawak enggau Brunei deka mantaika sembiang Mass Hari Minggu, Palm Sunday enggau Easter Sunday ngena chara online enggau ‘live-streaming’, berindik ari Atur Nagang Pemindah ketegal COVID19 dilanjarka ngagai 14 April 2020.
Bishop Gerija Anglika di Sarawak enggau Brunei, Reverend Datuk Danald Jute madah, mantaika sembiang nengah chara online enggau ‘Live-Streamings’ deka dipajakka seagi patut laban deka meransang raban orang Kristian ti diau di rumah enggau besampi ari rumah.
Sembiang Mass Hari Minggu deka terus diketuka dulu nyentuk gerah baru dipadahka, lalu tu ukai pemutus ti dikedeka tang tu pemutus ti mar ke patut digaga, ku iya.
“Palm Sunday, Good Friday enggau Easter iya nya hari tauka pengerami besai kitai lebuh orang Kristian keran deka datai ke gerija.
“Sayau amat, berindik ari Atur Nagang Pemindah, kitai enda ulih ngatur sebarang pengerami, gempuru enggau sembiang ba gerija maya pengerami besai tu.
“Taja pia, kami deka bejalaika atur khas dikena ngelai Palm Sunday enggau Easter Sunday, iya nya mantaika sembiang nengah chara online enggau ‘LiveStreamings’ lalu nengah chara tu raban orang Kristian sama ulih enggau besembiang sereta besampi,” ku iya lebuh dikerandau Utusan Borneo, kemari.
Ensanus, Menteri Besai Tan Sri Muhyiddin Yassin madahka berindik ari baka ti dipadahka opis pengerai ‘trend’ COVID-19 ti dipelabaka majak ngelekai, perintah besai ngaga pemutus Atur Nagang Pemindah ke patut iya naka 31 Mac, udah dilanjarka nyentuk 14 April 2020.
Ku Danald, berindik ari atur nya dilanjarka mensia mayuh patut meri kerejasama ngagai perintah nengah chara nitihka atur ke ditetapka dikena nagang pengelekai penyakit COVID-19 di menua tu.Bisi sekeda orang enda beratka Atur Nagang Pemindah ti dipejalaika perintah, ulah ti baka nya chukup mai ati enda lantang, mayuh pekara diayahka ketegal sekeda orang ti ngelanggar atur, ku iya.
“Kenyau ari pun nyadi Bishop, kami udah meransang mensia mayuh nitihka Atur Nagang pemindah. Laban ti nemu pandemik tu mai penusah, kami ngaga pemutus enggau berani nangguhka dulu gempuru kami.
“Diatu Atur Nagang Pemindah tu ditampung, sekali agi kami minta semua orang beratika pekara tu. Titihka mih atur nya! Tu beguna amat ! Beguna amat ba tetiap iku kitai bekerejasama sereta ngereja bagi diri! Diau di rumah, enti ukai sebagi ari servis ke pemadu beguna. Semina pansut enti amat bisi utai ke amat patut.
“Tetiap iku kitai mesti nyukung sereta nitihka Atur Nagang pemindah enggau diau dirumah dikena nagang pengelekai virus tu. Mayuh agi kitai ulih nitihka atur tu, mayuh agi kitai ulih nagang virus,” ku iya seraya madah enti ngelaban atur perintah, nya semina deka ngasuh gaya menua kitai balat ari ke udah.
Danald bepenemu kitai patut ulih beratika gaya penyadi di menua Itali tauka di Sepanyol ke alai sida ngarapka atur nagang perintah bekurung dipejalaika sebedau tu.
Sistem pengerai Malaysia enda datai ba renggat Itali tauka Korea Selatan, nya alai kitai mesti nentuka kitai ulih nempuh pandemik ngena chara bebida, ku iya.