Perintah nengeri deka numbuhka sub-komiti FSC Komiti tu betuaika Amar Awang Tengah Ali Hasan dikena nentuka bekal pemakai chukup di Sarawak
KUCHING: Perintah nengeri deka matau bekal pemakai di Sarawak nyengkaum di menua pesisir seruran chukup, nengah sub-komiti Rentayan Bekal Pemakai (Food Supply Chain-FSC) ti deka ditumbahka.
Kepala Menteri, Datuk Patinggi Abang Johari Tun Openg madahka nengah komiti nya perintah nengeri deka matau penyukup barang ke diguna ninting hari di nengeri tu semanjai Atur Nagang Pemindah (PKP) dipejalaika dikena nagang pengelekai COVID-19.
Nambahka sub-komiti FSC, perintah nengeri mega numbuhka Komiti Pengelikun, ku iya.
"Maya aum komiti pengelikun nengeri sehari tu (kemari) bisi dua sub-komiti ditumbuhka iya nya Food Supply Chain ti betuaika Sapit Kepala Menteri Datuk Amar Awang Tengah Ali Hasan.
"Kitai bisi komiti ari baruh Datuk Amar Awang Tengah deka matau (penyukup bekal barang nyengkaum di menua pesisir) bekal baka berau, gula enggau ke bukai. Kitai deka matau.
"Enggau Komiti Pengelikun ke ditumbuhka ti betuaika Sapit Kepala Menteri,
Tan Sri Datuk Amar James Jemut Masing, lalu komiti tu amat beguna ba pengawa ngiga jalai ngatur ngambika rayat ulih baka selama ," ku iya nyebut entara pemutus ke digaga ba aum komiti pengelikun nengeri.
Iya mantaika pekara nya dalam aum pengarang berita ti diatur ba Bilik Baum Besai Ringkat 2 Wisma Bapa Malaysia ditu, kemari.
Bejaku baru Abang Johari madah, reti nya perintah Sarawak deka seruran matau gaya utai ke nyadi nyengkaum empas ekonomi sereta perintah deka ngiga chara mutarka penanggul ngambika rayat ulih pulai idup normal tauka baka selama.
"Aku pechaya inisiatif ti dipejalaika perintah udah tentu deka meri empas manah ngagai ekonomi Sarawak enggau rayat," ku iya.
Nambahka nya Abang
Johari madahka entara pemutus bukai ke bisi digaga iya nya, perintah Sarawak deka ngangkatka agi atur pengawa nyaga garis antarabansa tauka entara menua.
"Kami deka matau pejalai mensia ba entara menua kitai enggau menua ke berimbai enggau kitai dikena nyeliah tauka nagang import COVID19," ku iya.
Kelimpah ari nya iya madahka Komiti Mutarka Penusah Ngenyit Nengeri (JPBN) Sarawak ngaga pemutus ngelanjarka timpuh operasyen premis dagang, klinik peribit enggau stesyen minyak pengelama 12 jam ari pukul 7 pagi ngagai 7 malam berindik ari Atur Nagang Pemindah (PKP) udah dilanjarka nyentuk 14 April tu ila .
Abang Johari ngarapka mensia mayuh nitihka atur nya ngambika pengelekai COVID-19 ba nengeri tu mujur ditagang tauka diputarka. "Kitai deka ngelanjarka timpuh operaysen ari pukul 7 pagi ngagai 7 malam berindik ari Menteri Besai Tan Sri Muhyiddin Yassin ti ngelanjarka timpuh PKP ngagai 14 April," ku iya.
Ba aum pengarang berita ke sama kemari, Abang Johari madahka hari bulan Aum Kunsil Nengeri (DUN) udah diubah ari 13 April ngagai 16 April setipak enggau PKP ti udah dilanjarka.
Bisi ba aum pengarang berita nya kemari Sapit Kepala Menteri Datuk Amar Douglas Uggah Embas, Awang Tengah enggau Masing sereta Menteri Kaunsil Kandang Menua enggau Pengawa Berumah Dato Sri Dr Sim Kui Hian, Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Datimah Abdullah sereta sida kebukai.