Pengelekai COVID-19 meri empas ngagai pengemeranka industri
SIBU: Pengelekai penyakit COVID-19 udah meri empas ngagai bala ti ngemeranka industri di menua tu nyengkaum industri kayu lumpung enggau betanam betupi sereta semua renggat mensia mayuh.
Chairman Serakup Pemansang Kandang Menua Batang Oya, Kunsilor Henry Kanyan Vincent Rawing madah, ekonomi menua betapi enggau pemar ke balat agi ketegal timpuh Atur Nagang Pemindah (PKP) ti dilanjarka.
Ku iya, serakup nya ti ngemeranka industri kayu lumpung enggau betanam ngeluaka nenas MD2, PKP ti diterit kenyau ari 18 Mac udah ngujungka semua nya tepagang.
“Pengawa meresi palan alai nanam nenas MD2 nyau tepagang. Baka nya mega engggau pengawa ngulihka kayu lumpung, enti semua kayu enda ulih dijual, semua nya deka nagang pejalai mata duit.
“Kami deka betapi enggau pemar besai ketegal pengawa ngelanjarka timpuh PKP nyentuk 14 April. Nama penyadi, kami semina ulih besampi lalu nyerah ngagai Tuhan,” ku iya leb uh dikerandau pengarang berita ensanus.
Henry Kanyan ke mega Exco Pampang Nembiak Parti Rakyat Sarawak (PRS) bela berasai meda sekeda ari peranak menua begunaka bantu belanja dikena meli barangke diguna sekumbang timpuh PKP.
“Sekumbang timpuh PKP tu, sida nadai gawa ti ngujungka sida nadai penatai pemisi. Kami pan mar mantu sida laban semua projek betanam ti dipejalaika tegang magang ti ngujungka pejalai mata duit bela tepagang,” ku iya.
Ku iya, pemadah Menteri Besai Tan Sri Muhyiddin Yassin bekaul enggau pengelunggar ngemansutka duit ari Kumpulan Wang Simpanan Pekerja (KWSP) nyentuka timpuh 10 bulan siti berita ti meri pengelantang ngagai rayat di menua tu.
“Ba raban ke nadai KWSP, sida semina ninga aja berita manah nya tang enda ulih ngasaika nya,” ku iya.
Iya ngarapka perintah ulih ngiga jalai dikena mantu raban ti ngemeranka industri nyengkaum betanam betupi ti kena empas ketegal penyakit ti tau munuh nyawa di menua tu.
“Baka nya mega enggau raban ti nadai duit taruh ba KWSP. Semua serak rayat di menua tu berasai amat laban pengelekai COVID-19 lalu begunaka bantu,” ku iya.