Rayat dikerapaka 100 peratus nitihka atur PKP
KUCHING: Atur Nagang Pemindah (PKP) ti dilanjarka ngagai 14 April 2020 disukung sereta dikearapka rayat 100 peratus nitihka atur ti ditetapka ari baruh nya (PKP).
Polycarp Danson, bepenemu pemutus perintah ngelanjarka timpuh Atur Nagang Pemindah siti chara nagang sereta mutuska rentayan rampit COVID-19. Nitihku iya, seminggu ke udah urung semina 95 peratus atur nya dititihka lalu ulah ti enda nitihka atur ulih dipeda maya nya laban agi mayuh mensia bekesegau enda nitihka pinta atur nya.
Iya melabaka dalam urung lima peratus ke enda nitihka atur engka bisi ngembuan virus ba tubuh ke tau ngelekai.
“Nengah pemutus ngelanjarka Atur Nagang Pemindah tu, kitai ngarapka 100 peratus ulih nitihka atur ke udah ditetapka iya nya diau dirumah. Ari tu rentayan rampit ulih ditagang.
“Nyema bisi orang ke kena virus tu, lalu bejalaika atur kuarantin diri di rumah, virus tu ulih ditagang.
“Nya alai pemutus ngelanjarka Atur Nagang pemindah tu endang bisi pemanah, awak ke penyakit tu enda ngelekai ketegal agi bisi bala sekeda ke agi sesegau di luar enda nitihka atur,” ku iya.
Berebak enggau tu, Polycarp mega madah nyerumba Atur Nagang Pemindah ti benung dipejalaika, mensia mayuh tau ngena awak diau begulai enggau diri sebilik di rumah sereta meresi kandang rumah diri.
“Sama besaup mih kitai nyaga pengerai diri empu, diri sebilik sereta diau di rumah awak ke menua kitai Malaysia nadai agi dirampit COVID-19,” ku iya.
Nambahka nya Spanski Steven, 24, melabaka PKP dilanjarka engka ketegal kes ke pemadu baru COVID-19 bisi ngayanka penambah, nya kebuah Menteri Besai ngaga pemutus nya pengudah berandau enggau Kaunsil Pengelikun Menua (MKN) sereta udah dilalau Opis
Menteri Pengerai Malaysia (KKM).
“Pemanah laban sida penerit adat deka ngenukuka pengelekai COVID-19 tu ba tikas kusung, enti kes bisi ngayanka penambah, nadai nurun engka deka dilanjarka agi.
“Ba kitai tu chara ti pemadu manah ke digaga Menteri Besai taja pan nya pemutus ti berat digaga iya, laban iya nadai pilih bukai kelimpah ari ngelanjarka timpuh nya ke pengelikun rayat.
“PKP tu endang deka ngeruga ekonomi kitai Malaysia, tang kitai enda ulih ngenggai laban tu chara ti pemadu manah dikena nagang pengelekai virus tu enggaika majak balat nyadi,” ku iya seraya nyemaka virus nya baka munsuh, munsuh ti enda ditemu alai diau.
Ensanus, Menteri Besai Tan Sri Muhyiddin Yassin mantaika pemutus madah PKP dilanjarka ngagai 14 April 2020.
Sebedau tu PKP ditimpuhka naka 31 Mac.