OSC ungkup orang ti nadai palan pengentap pendiau diperambu dibuka di Sibu
KUCHING: Opis Menteri Pengelantang Pendiau, Komuniti, Orang Indu, Ruang Bilik enggau Pemansang Nembiak Mit (KWKPK) deka minta agih belanja ari perintah nengeri dikena ngaga sebuah begunan ‘one-stopcenter’ (OSC) ungkup orang ti nadai palan pengentap pendiau ti bekedayau di Sibu.
Menteri KWKPK Dato Sri Fatimah Abdullah madah, opis menteri nya nyukung perambu Residen Sibu, Charles Siaw sebedau tu ti deka ngubah begunan lama MAKSAK di Sibu nyadika OSC ke tuju nya.
“Kitai ngerundingka perambu tu ulih diterima ke alai orang ti nadai palan pengentap pendiau ti bekedayau ulih singgah mandi, makai, tinduk lalu ulih mega ngiga pengawa lebuh ti ba palan nya.
“Taja pia, palan nya ukai tempat dikena sida mendam diau dia, tang semina nyadi palan endur sida singgah aja,” ku iya.
Iya madah munyi nya lebuh ti ditemu media pengudah matau orang ti nadai palan pengentap pendiau ba kandang endur mengeri Kuching iya nya ba Palan Bedaja enggau Rekreasyen Song Kheng Hai, Taman Awam enda jauh ari Padang Lumba enggau Main
Jubilee enggau Taman Hok Kien ditu, kilah ensana.
Pia mega, Fatimah bisi madahka, palan nya deka nyendiaka peluang gawa baka nuchi kerita ba palan ngengkahka kerita di kandang endur premis nya taja pia nya nitihka atur ke ditetapka.
“Nyema palan nya mujur, kitai nyangka deka ngerembaika nya ngagai kandang menua bukai di nengeri tu.
“Penyampau orang ti nadai palan pengentap pendiau di Sarawak naka ke diatu, enda mayuh tang nyangka nya deka betambah, nyema nadai inisiatif digaga,” ku iya nandu.
Bejaku bekaul pengawa matau orang ti nadai palan pengentap pendiau nya, Fatimah madahka, pengawa nya nyadi sebagi ari inisiatif mantu orang ti nadai pengentap pendiau nya ngembuan palan endur diau sementara kelebih agi semanjai timpuh Atur Nagang Pemindah (PKP) berindik ari pengelekai COVID-19.
Nitih ku iya, orang ti nadai palan pengentap endiau ba mengeri besai di Kuching, Sibu enggau Miri deka diengkah ba palan diau sementara nyentuk 31 Mac tu.
“Kitai deka ngulihka penerang orang ti nadai palan pengentap pendiau ari Opis Pegintu Pengelantang Komuniti dikena meri sida palan endur diau sementara.
“Nyema di Kuching, kitai ngengkahka sida ba Anjung Singgah, Satok, di Sibu ba Rumah Rehat Kerajaan lalu di Miri, kitai agi ngiga palan ti engkeman lalu nya deka dipadahka ngagai Komiti Mutarka Penusah Ngenyit Bagi Menua,” ku iya.
Naka diatu (24 Mac), ku iya, bisi 144 iku sida ti nadai palan pengentap pendiau di selampur Sarawak udah dirikod enggau 44 ari sida nya ba Kuching, 21 iku ba Sibu lalu 17 iku ba Miri.
Ari penyampau nya, 18 iku orang ti nadai palan pengentap pendiau bisi penanggul mental, enam iku gian dadah lalu kebukai nya napi penanggul ruang bilik sereta idup kediri.
Sama bisi enggau pengawa matau nya DAtuk Bandar Opis Kaunsil Mengeri Kuching Selatan (MBKS) Dato Wee Hong Seng enggau raban Polis Diraja Malaysia sereta JKM Sarawak.