Bantu kaban, diri sebilik ngerejista diri minta bantu nengah ‘online’: Dennis
MIRI: Rebak ti ngembuan pelajar kelebih agi ari menua pesisir patut mantu diri sebilik tauka orang ti semak rumah sida ngerejista nengah ‘online’ dikena ngemudahka sida nerima bantu ari perintah.
Kaban Kunsil Nengeri Telang Usan Dennis Ngau madah, tebal agi penerima bantu di menua pesisir iya nya ari raban B40 sereta M40 nyengkaum orang lunggar umur.
“Maya diatu semua pom ngerejista minta bantu perintah digaga nengah ‘online’, ungkup lunggar umur tauka sida ti nadai pelajar lalu endang tusah ngagai sida deka ngisi tauka ngemaruka pom.
“Kelimpah ari nya, aku minta rebak biak ti landik dalam teknologi sereta bepelajar mantu diri sebilik sida, kaban belayan tauka orang ti semak rumah ti nadai pelajar berejista minta tauka ngemaruka bantu BSH tauka
Bantuan Prihatin Nasional,” ku iya madah ngagai Utusan Borneo ensanus.
Dennis mega meri terima kasih ngagai inisiatif perintah mantaika siti agi bantu baru ti lebih fokus ngagai isi rumah bepenatai pemisi
RM4,000 ngagai RM8,000 tauka M40.
“Taja pia aku irau bantu nya enda datai ngagai penerima laban tebal agi peranak ti diau enda besemak enggau pangan diri sereta tusah diakses ngujungka sida ti patut bulih bantu nya tinggal ari sistem data perintah.
“Nya alai aku ngarap perintah ngiga inisiatif ke bukai dikena nentuka raban B40 enggau M49 ti patut bulih bantu Prihatin Nasional tu nadai dikelaung,” ku iya.
Ku Dennis, bisi sekeda peranak ba menua pesisir ti patut bulih bantu tang nyau tinggal laban enda nemu rentayan tauka chara deka minta.
“Bisi peranak suah betemu enggau pengari rayat deka minta bantu sekula anak tauka deka ke klinik berubat.
“Aku seruran ngelalau sida betemu enggau pemesai kami di opis pelilih menua ti besemak berejista ngisi bantu ngambika sida ulih ditulung perintah,” ku iya nerang.
Nitihka Dennis, tebal agi ti endang begunaka bantu iya nya sida ti nadai ngembuan pelajar sereta lunggar umur ti pemar minta bantu nengah ‘online’.
‘Nya kebuah, aku minta ngambika rebak ti landik dalam teknologi sereta bepelajar tu mantu ngerejista raban ti pematut bulih Bantu Prihatin Nasional,” ku iya nerang.
Dennis mega enggai meda raban ti patut bulih bantu ditinggal lalu ngujungka sida berunding perintah nadai mantu sida.
“Enti ulih perintah sama bejalaika pengawa sereta enda semina bepanggai ngagai ngerejista nengah ‘online’ laban mayuh kandang menua pesisir nadai akses komunikasyen,” ku iya nerang.