RM50 juta dikemendar kena bejalaika SKMS
KUCHING: Perintah Sarawak udah ngemendarka ungkup belanja sepenyampau RM50 juta dikena bejalaika Skim Kredit Mikro Sarawak (SKMS), nyengkaum ke dibantaika dalam Pakej Bantuan Khas Sarawakku Sayang maya ke kena empas Atur Nagang Pemindah (PKP) dikena nagang pengelekai COVID-19.
Sapit Kepala Menteri, Datuk Amar Awang Tengah Ali Hasan madah, ungkup belanja nya dikena mantu sereta ngerembaika PKS ti nyadi tulang belakang pemansang ekonomi menua enggau nengeri ti bisi urung 98 peratus orang dagang di menua tu nyengkaum di Sarawak, iya nya PKS.
YAB Kepala Menteri kena 20 Mac 2020 tu tadi bisi mantaika pakej Bantu Khas Sarawakku Sayang. Siti ari dalam pakej iya nya nambahka ungkup belanja sepenyampau RM20 juta dikena bejalaika Skim Kredit Mikro Sarawak (SKMS) dikena ngelempung pemar ke ditapi PKS di nengeri tu, ku iya.
“Perintah Sarawak udah ngemendarka ungkup belanja sepenyampau RM30 juta dikena bejalaika skim tu.
“Tang, ketegal pengibuh Perintah Sarawak deka ngelempungka pemar enggau ngemuntangka orang dagang ti kena empas pekara ti ditapi nya diatu, YAB Kepala Menteri Sarawak udah setuju nambahka ungkup belanja sepenyampau RM20 juta ngagai Skim Kredit Mikro Sarawak tu.
“Reti nya, penyampau semua ungkup belanja tu iya nya sepenyampau RM50 juta.
Awang Tengah ti mega Menteri Dagang Antarabansa enggau Industri, Terminal Industri enggau Pemansang Orang Dagang mansutka pekara nya dalam aum pengarang berita Skim Mikro Kredit Sarawak ti diatur ba bilik baum opis menteri nya di Wisma Sumber Alam ditu, kemari.
Batang tuju SKMS tu iya nya nyendiaka duit jalai mudah ngagai orang dagang mit enggau jelan pemesai dikena ngerembaika dagang sida, ku iya.
Nitihku iya Program Mikro Kredit tu deka dipejalaika Kaunsil Pemansang Ekonomi Sarawak (SEDC) enggau Agrobank lalu pom peminta tau diambi ari website opis menteri nya enggau ejensi nya tauka betanya ngagai ejensi nya.
“Laban kitai agi dalam timpuh PKP, peminta tu tau digaga ngena chara online berengkah ari bulan April (sehari tu), tauka terus ngagai ejensi.
“Lalu dikena ngelempungka penanggul PKS, Perintah Sarawak deka ngemendarka bayar pulai ditangguh pengelama 6 bulan (ari bulan April nyentuk September) ngagai sida ti nginjau skim tu,” ku iya ti mega Menteri Pemansang Mengeri enggau
Pengeraja Asal II.
Nitihku iya, SKMS dibagi ngagai dua (2) skim iya nya SKMS I enggau SKMS II, lalu ari baruh SKMS I iya nya nyendiaka duit jali ari RM1,000 - RM10,000 enggau nadai penyampau bungai ti meri penguntung ngagai raban orang dagang B40.
SKMS II deka nyendiaka duit jali ari RM5,000 nyentuk RM50,000 enggau penyampau bungai tauka penyampau untung 4 peratus ninting bulan ti majak kurang (ti urung setipak enggau penyampau efektif 2 peratus) ngagai orang dagang mikro enggau mit.
“Skim Kredit Mikro tu dibuka ngagai semua pengemeran PKS kitai, sekalika sida tu Bumiputera tauka ukai Bumiputera,” ku iya.
Kelimpah ari nya ku iya, Kepala Menteri Sarawak mega udah nangguhka mayar pulai pengelama 6 bulan ngagai penginjau Skim Duit Jali Industri Mit enggau Jelan Pemsai (SPIKS). Tu deka meri penguntung ngagai 144 penginjau SPIKS.
Sama bisi ba aum pengarang berita nya Menteri Muda Pemansang Orang Dagang enggau PKS Datuk Mohd Naroden Majais, Menteri Muda Pemansang Industri Datuk Malcom Mussen Lamoh enggau Sekretari Mendam, Opis Menteri Dagang Antarabansa enggau Industri, Terminal Industri enggau pemansang Orang Dagang Datu Liaw Soon Eng.