Dua iku lelaki keterubah endar ditangkap ba kandang menua Betong ketegal ngelaban PKP
DEBAK: Dua lelaki ditangkap pengudah enda nitihka Atur Nagang Pemindah (PKP) sereta nagang pengereja pengawa perintah bejalaika pengawa lebuh ke Ngempang Jalai Alun (SJR) ditu lemai ensanus.
Kededua suspek beumur 30 enggau 18 taun ke asal ari Kampung Debak Laut, ditan lebuh ke nguji ngelepaska diri ari SJR ti benung dipejalaika.
Suspek dipadah ari Kampung Lalang ke Kampung Debak Laut sereta pansut nadai kebuah enggau tuju ke berat.
Lebuh ke ditan, seduai nya bejaku kasar sereta ngelaban polis tang lebuh dipinta mandangka pengelala diri, seduai enggai meri kerejasama sereta nguji ngerarika diri.
Timbal ke diterima ari suspek madahka diri nemu sentang perintah PKP enggau
SJR ti benung diteritka.
Maya nya mega seduai sama enda ulih meri kebuah ke berat seduai pansut sekumbang maya PKP tu.
Kepala Polis Pelilih (KPD) Betong, DSP Zamry Alli ngenukuka bisi nangkap lalu minta mensia mayuh nitihka perintah PKP ti udah dikeluarka perintah.
Iya ngelalau peranak ba menua nya ngambi meretika perintah nya sereta pansut maya ke enda tau enda meli barang ke diguna lalu semina ketuai ruang bilik aja dikemendarka.
“Berebak enggau nya mega sama bebasaka undang-undang ti dipejalaika.
“Polis deka ngambi atur ke terit nyengkaum nangkapsesapa individu ti ngelanggar PKP tu ke pemaik mensia mayuh ke bukai,” ku iya.
Tambah iya, mensia mayuh mega dipinta meri kerejasama sereta nitihka atur perintah nentuka sida sebilik anang mindah ari rumah.
Kelimpah ari nya, endang beguna amat mega nyaga pemeresi enggau pengelikun diri enggau diri sebilik dikena mutuska rentayan pandemik COVID-19.
Berebak enggau nya, suspek ke ditangkap nya dibai ngagai Indu Opis Polis Pelilih (IPD) Betong ngambika dipansik sereta diukum.
Mutosikal ke dikena suspek mega dirampas.
Kes nya diengkah ari baruh Seksyen 186 KK/Atur 7 (1) Atur Nyeliah sereta Nagang Penyakit Berampit (Tusun Atur Dalam Kandang Endur Berampit) 2020.
Seduai tu keterubah endar ditangkap kenyau ari PKP dipejalaika ba kandang menua Betong.