Komiti Mit Rentayan Pemakai nyakal penerang sentang rega bantu pemakai: Awang Tengah
KUCHING: Komiti Mit Rentayan Pemakai nyakal penerang ti dikerembaika ba media rama sentang rega pemakai ti disedia sereta ke disadung ngagai rayat sepenyampau RM100.
Sapit Kepala Menteri Datuk Amar Awang Tengah Ali Hasan madah, komiti deka ngena duit ke diungkup dikena meri bantu bekal barang pemakai ngagai raban ke ditagit.
Awang Tengah ti mega chairman komiti nya madah, bisi isu ungkus bantu ungkup penerima tu ti dikerembaika ba media rama ti meri penyarut ngagai mensia mayuh.
“Bisi penyarut bekaul enggau ungkus bekal pemakai ti dibagi ngagai rayat.
“Lalu ditu aku deka nerangka iya nya Komiti Mit Rentayan Pemakai enda kala ngeluarka sebarang penerang bekaul ungkus pemakai ti disediaka nya sepenyampau RM100.
“Komiti udah ngemutuska deka ngena belanja RM16.4 juta ti dikemendarka Kepala Menteri dikena meri bantu bekal barang pemakai pemun ngagai raban ditagit di serata nengeri nitihka sitak Kunsil Nengeri,” ku iya nerangka pekara nya ba aum pengarang berita.
Awang Tengah ti mega Menteri Dagang Antarabansa enggau Industri, Terminal
Industri enggau Pemansang Orang Dagang mansutka pekara nya nyerumba Aum Pengarang Berita Skim Kredit Mikro Sarawak ti diatur ba bilik aum opis menteri nya di Wisma Sumber Alam ditu, kemari.
Bejaku baru iya madahka raban ditagit ti dibekalka enggau pemakai pemun tu deka ditentuka Komiti Mutarka Penusah Ngenyit (JPBN) bagi menua tauka pelilih nengah kerejasama ejensi perintah, palan servis enggau gerempung ukai dikuasa perintah (NGO) ke bekaul.
Ku iya, sebedau tu endang bisi beberapa iku pengari rayat nengah Palan Servis enggau NGO ti bisi penyiru udah bejalaika inisiatif sida empu nganjung barang pemakai ba endur sida.
“Kitai nemu pekara tu sereta beterima kasih ngagai pemanah nya enggau inisiatif tu bepanggai ngagai pengulih enggau pementas ati pengari rayat enggau NGO nya.
“Nya alai isu ungkus rega barang ti diagih ngagai tiap rumah tauka ruang bilik enda patut nyadi enggau nyadi penyarut ngagai penerima bantu pemakai tu.
“Batang tuju komiti kami tu iya nya ngenukuka sepemayuh ke ulih deka bulih bantu pemakai lebih agi di kandang menua pesisir enggau menua ulu, raban seranta mengeri enggau sida ti putus bekal pemakai ketegal Atur Nagang Pemindah (PKP),” ku iya.
Nambahka nya Awang Tengah madahka bekal pemakai dalam nengeri Sarawak chukup.
Nya alai ku iya, dilalau ngambika penguna enda meli barang ngelui ari ke patut.
“Ngagai pemekal sereta orang dagang (dilalau) ngambika enda bejalaika aktiviti ngelalaika barang ke guna besesehari kelebih agi barang ke dijaga perintah,” ku iya.