Peranak flat Sibu Jaya nerima bantu pemakai ari Happinwin Development Sdn Bhd
SIBU: Kompeni Happinwin Development Sdn Bhd nyuaka bantu baka beras, telu enggau mi ngagai peranak flat Sibu Jaya ditu, ke guna sekumbang timpuh Atur Nagang Pemindah (PKP) ti dipejalai nyentuk 14 April tu ila.
Direktor kompeni nya ke mega siku ari Raban Opis Pelilih Menua Pesisir Sibu (SRDC) Kaunsilor Kong Yii Tee madah, sekumbang timpuh PKP tu, endang mar alai mensia mayuh ngulihka bekal pemakai enggau barang ke guna ninting hari sida.
“Pengelekai virus COVID19 balat ngeruga sereta mai penusah ngagai tetiap iku kitai. Nya alai, mensia mayuh patut beserakup ngelaban penguji tu.
“Ketegal pemindah kitai ditagang, aku ngarapka bantu tu ulih meri pemaik sereta ngurangka tating penusah raban ke endang begunaka bantu,” ku iya lebuh dikerandau pengarang berita, ensanus.
Berebak enggau tu, Kong ngansak mensia mayuh kelebih agi peranak ke diau ba flat ditu, ngambika nitih atur perintah PKP.
Berindik ari nya, ku iya, kerejasama ari mensia mayuh amat chukup beguna ngambika pengelekai COVID-19 tu ulih dipunaska lalu gaya pengidup kitai deka likun baka selama.
Ku Kong, iya minta mayuh agi raban korporat, sektor peribit sereta orang dagang, sama bela meri bantu ngagai bala rayat ke benung napi penusah sekumbang PKP tu.
Berebak enggau nya, Chairman Gerempung Bansa Dayak Sarawak (SDNU) Sibu Jaya Dangang Ugik, madahka bantu tu endang beguna ungkup peranak Sibu Jaya ke diau ba flat ditu.
Ku Danggang, ke diatu, raban pekereja ke begaji hari nyau begunaka duit galau ke majak kurang dikena nampung belanja diri lalu nangika enda chukup nyentuk timpuh PKP abis kena 14 April tu.