Iya ke mati nya siku pengelicha beumur 40 taun ari Kota Samarahan, iya nadai ba Sepital Besai Sarawak kemari
KUCHING: Siku pengelicha beumur 40 taun ari Kota Samarahan diripotka mati ketegal COVID-19, kemari.
Pekara nya dipadahka Menteri Kaunsil Kandang Menua enggau Pengawa Berumah, Dato Sri Dr Sim Kui Hian dalam aum pemberita COVID-19 Sarawak ba Wisma Bapa Malaysia ditu.
“Sarawak sehari tu (kemari) ngeripotka siti kes baru mati. Iya ke pemadu baru mati (ketegal COVID-19) beumur 40 iya nya pengelicha ari Kota Samarahan.
“Iya mati ba Sepital Besai Sarawak,” ku iya pengudah aum Komiti Mutarka Penusah Ngenyit Nengeri Sarawak (JPBN Sarawak), kemari.
Nitihku Dr Sim, dua (2) kes pemati ensanus iya nya siku lelaki ke beumur 47 taun di Kuching enggau indu beumur 41 taun di Miri, lalu kluster agi dipansik.
“Ke ditemu kitai iya ke Kuching kemari (ensanus) iya kus ba UKM enggau siku agi iya nya ke di Miri,
Dato Sri Dr Sim Kui Hian
Menteri Kaunsil Kandang Menua enggau Pengawa Berumah
iya enda kala pansut ari Sarawak,” ku iya ba aum pengarang berita nya.
Ku Dr Sim Sarawak diatu bisi beberapa kluster baru kelimpah ari lima ari ti udah ditumbuhka Opis Pengerai.
Nambahka iya madahka Sarawak naka kemari ngerikodka 21 kes positif baru COVID-19 iya nya 20 kes ba Sepital Besai Sarawak enggau siti kes diperubatka ba Sepital Sibu.
“Tu ngujungka penyampau semua kes positif iya nya 135 kes,” ku iya seraya madahka kemari pemadu mayuh kes positif kenyau ari COVID-19 berengkah.
Berindik ari kes positif, iya bebendar ngelalalu mensia mayuh ti kala semak enggau ‘kontak’ patut beperesa pengerai ke bisi dipejalaika ba Kompleks Nembiak Lumba enggau Main.
Ku iya, UNIMAS udah berengkah mantu Sepital Besai Sarawak bejalaika pengawa meresa tauka nguji Polymerase Chain Reaction (PCR) COVID-19, lalu Sepital Sibu mega bejalaika atur ti sama berengkah ensanus.
Kelimpah ari nya Dr Sim mega madahka bisi 46 kes baru dipelabaka (PUI) COVID-19 lalu kenyau ari ensanus 93 pesakit agi ba beberapa buah sepital di nengeri tu iya Sepital Besai Sarawak, Sepital Sibu, Sepital Bintulu enggau Sepital Miri.
Bisi semilan (9) iku ba Unit Intu Siru (ICU) iya nya lapan (8) ba Sepital Besai Sarawak enggau siku(1) ba Sepital Sibu, ku iya.
“Naka ke diatu, kitai bisi 14 iku pesakit udah dikemendarka pulai iya nya sembilan (9) ari Sepital Besai Sarawak enggau Sepital Sibu (4) sereta siku(1) ari Sepital Miri,” ku iya, ti disempulang Direktor Opis Pengerai Nengeri Sarawak, Dr Chin Zin Hing enggau ke bukai.