Kemeranka seraka sosial dikena nagang pengelekai COVID-19

KUCHING: Datuk Bandar Opis Kaunsil Mengeri Kuching (MBKS), Datuk Wee Hong Seng madah seraka sosial beguna amat lebuh ba palan mensia mayuh dikena nagang pengelekai Koronavirus (COVID-19).

Ku iya nambah, taja perintah udah mantaika mayuh polisi dikena nagang pengelekai virus COVID-19tangnyamengkang nadai pemujur nyema rayat agi temil sereta enggai nitihka semua atur polisi nya.

“Polisi perintah iya nya deka ngemerankan seraka sosial...Perintah bejalaika mayuh polisi tang ba pengujung atur nya bepanggai ngagai mensia mayuh...enti nadai kerejasama sida, nya nadai bulih pemujur.

“Kena ninting Hari Enam enggau Hari Minggu kitai udah meda pemayuh bala mensia ba Makit Komuniti Stutong taja timpuh Atur Nagang Pemindah (PKP) benung dipejalaika lalu kemari mega ulih diperati bisi entara sida tu bebelika barang perengka dapur,” ku iya baa um media beserimbai Atur Meresa Tikas Pengangat Tubuh di Pasar Komuniti Stutong ditu kemari.

Nya alai, kenyau raban MBKS udah neritka atur ke alai semina siku aja pengari ari tetiap isi rumah dikemendar tama bebelika sayur enggau dagin pengudah diperesa pengangat tubuh enggau diberi ‘sanitasi’ jari.

Raban MBKS mega udah nagang semua endur tama enggau pansut mensia mayuh tang ngemendarka semina siku aja tama enggau pansut sekali tama ke dalam makit nya.

Bala pekereja enggau komiti pasar nya mega diberi sengkabung idung enggau mulut maya bejalaika pengawa matau ba endur pasar.

Wee nerang, pengudah Pasar Komuniti Stutong, sida deka ngagai Pasar Kenyalang Park enggau Makit Besai Petanak bejalaika pengawa ke sama lalu ditangkan ba Palan Bedaja Sungai Apong, Pasar Jalai Upper Foochow sereta Makit Basah Bintawa.

Pasar Komuniti Stutong bisi 525 iku orang pedaja, Makit Kenyalang Park (226), Makit Besai Petanak (230), Palan Pedaja Sungai Apong (63), Pasar Jalai Upper Foochow (18) enggau Pasar Makit Bintawa (19).

Pia mega, Wee nambah raban sida bedau meri pemutus ngemendarka Bazar Ramadan dibuka nganti gaya penusah udah manah ari pengelekai COVID-19.

Tang ku iya nyemetak, enti gaya tu majak bedau manah sida deka nginsil bazar Ramadan nya.