IPG Miri nyadi palan kuarantin COVID-19 kedua di Miri
MIRI: Sebuah agi palan kuarantin deka ditumbuhka ba ditu, iya nya ba Palan Pematih Pengajar (IPG) Miri, ke diatu ba renggat kepenudi tembu disikap.
Menteri Perengka Pengangkut Sarawak Datuk Lee Kim Shin ti mega chairman Komiti Mutarka Penusah Ngenyit Bagi Menua Miri madahka palan kuarantin baru di IPG Miri tu, dipelaba deka tembu abis laun Hari Lima tu.
Lee madah pekara tu lebuh nyadi chairman ba aum komiti nya di Opis Pelilih Menua Miri ditu, ensanus.
Kelimpah IPG Miri, palan kuarantin di Miri keterubah ungkup pesakit COVID-19 dibuka ba Kampung Sukan Petronas.
Iya mega madah, sesapa individu ti bisi tanda kena penyakit nya, dipinta betelefon ngagai Bilik Operasyen Opis Pengerai Bagi Menua Miri ba lumur 085-322085 ari pukul 8 pagi nyentuk pukul 5 lemai, ti beoperasyen kena Hari Satu ngagai Hari Enam nyengkaum kemisi besai.
Sentang orang ti nadai palan endur diau ngelingi pasar besai Miri, baka ti bisi dibantai nengah Utusan Borneo kemari, Lee madah minta siti komiti khas ditumbuhka dikena mutarka isu nya.
“Siti komiti khas deka ditumbuhka, ti dipegai
Pemangku Residen Bagi Menua Miri (Abdul Aziz Mohamad Yusuf) dikena ngiga chara mutarka enggau atur ke patut,” ku iya.
Komiti mega ngelanggur berundingka siti mekanisma magi pemakai ngagai raban ti begunaka bantu.
Lee madah Opis Pengintu Pengelantang Raban Bansa (JKM) Bagi Menua Miri deka nyadi pengatur ba pengawa magi bantu pemakai tu.
“Taja pia, individu kediri, Gerempung Ukai Dikuasa Perintah (NGO) sereta Palan Servis ti deka mantu magi pemakai tu dipinta betelefon sereta ngerejista dulu ngagai Komiti Mutarka Penusah Ngenyit Bagi Menua Miri nengah JKM ti mangku pengawa nya,” ku iya.
Lee mega madah, JKM deka netapka siti rintai pemakai ti deka dibeli nyadika malin ke tuju bantu nya ngagai raban ti begunaka bantu ba bagi menua Miri.
“Kami deka netapka siti palan khas dikena naruh sementara, pemakai ke ungkup disadung. Palan tu mega deka diguna alai nerima enggau ngumpul barang bagi bantu ari individu enggau NGO sebedau dibagi,” ku iya.
JKM Miri deka numbuhka siti sistem dikena nentuka bantu pemakai datai ngagai raban ke ditagit sereta nentuka nadai siku pan tinggal.
Pia mega, sentang bekal pemakai ditu, Ketuai Pampang Opis Dagang Dalam Nengeri enggau Pekara Penguna (KPDNHEP) Miri, Joe Azmi Jamil, madah ripot stok bekal barang ke dijaga baka gula, tepung, minyak sumai, LPG, petrol, diesel sereta barang ke guna besesehari mega chukup ungkup semua bagi menua Miri.
“Kitai udah meresa stok bekal pemakai bagi menua Miri nya chukup, maksimum nyentuk 3 bulan. Mensia mayuh dilalau ngambika anang irau, beli nitihka patut lalu anang begau bebelika barang,” ku iya.
Ba awak nya, tamu ari baruh pegai Opis Kaunsil Mengeri Miri (MBM) diatu udah beoperasyen bejual, tang jam operasyen iya nya ari pukul 7 pagi ngagai pukul 2 lemai aja.
Entara tamu ti udah dibuka baru pengudah minta pemendar Opis Menteri Kaunsil Kandang Menua enggau Pengawa Berumah Sarawak iya nya Tamu Muhibbah, Tamu Khas, Tamu Kadayan, Tamu Dato Hj Ahmad Lai Luak, Tamu Morsjaya, Tamu Taman Tunku sereta Tamu Pujut Corner.
Pengudah aum nya mega, Lee udah nyuaka bantu pemeri sengkabung mua 500 unit ngagai Direktor Sepital Miri, Dr Jack Wong.
Iya ti ngarika Komiti Mutarka Penusah Ngenyit Bagi Menua Miri meri tabi basa ti besai enggau terima kasih ngagai volunteer atas inisiatif mantu ngaga sengkabung mua ungkup ke guna raban perubat Sepital Miri.
Naka diatu 1,000 unit sengkabung mua baka nya udah diasilka sereta udah dibagi ngagai tim rintai mua di bagi menua Miri, ensanus.