Peranak Rh Lembang nerima bantu pemakai ti disuaka Ugak
KAPIT: MP Hulu Rajang Datuk Wilson Ugak Kumbong pagi ensanus udah nyuaka bantu pemakai ngagai peranak Rumah Lembang, Nanga Sedugau, Sungai Ga’at, Baleh ke panjai 13 pintu.
Pengawa nya dipejalaika ba kedai runchit ditu.
Barang ke disuaka baka berau, gula, bichin, biskut, minyak sumai, kopi, teh enggau ke bukai ti beungkus RM100.00.
Kelai nyuaka nya barang nya udah disuaka ngagai Tuai Rumah Lembang ke mega chairman JKKK Rumah Lembang.
Sama bisi ngulu pengawa nya Sekretari Politik Kepala Menteri, Nicholas Kudi Jantai.
Sama bisi datai mega Pemesai Opis Pengintu Pengelantang Pendiau Kapit, Daniel
Teo enggau kaban komiti PRS sitak Parlimen Hulu Rajang, ke mega mantu ngatur pengawa nyuaka bantu pemakai nya.
Ugak lebuh ke bejaku, ngelalau peranak dia ngasika Atur Nagang Pemindah ( PKP). Iya madahka raban penerit adat PKP ukai ngaga penusah ngagai rayat tang ketegal pengelekai virus COVID-19 ti tau munuh nyawa.
Ku iya, dikena nyaga rayat menua tu, perintah nadai pilih bukai tang ngambi pemutus ngenyit dikena mutarka pandemik nya.
“Perintah bisi kebuah neritka PKP laban perintah Malaysia benung bebendar munaska virus COVID-19. Atur ngenyit udah dipejalaika dikena nagang pemindah rayat ngambika enda ngerembaika penyakit nya”, ku
Ugak.
“Perintah siru sereta nemu utai ke diguna rayat. PKP meri empas ngagai peranak ngagai menua lalu mayuh sida besebanaka pemar ke ditapi ngulihka utai ke amat diguna.
“Aku meri terima kasih ngagai Perintah Besai enggau Perintah Nengeri laban ti udah ngungkupka belanja nengah pengari rayat ngambika ulih di beri Pakej Bantu Pemakai.
Opis Pengintu Pengelantang Pendiau udah diberi tanggungpengawa nyadung bantu pemakai ngagai semua ruang bilik ke patut nerima.
Ungkup sitak parlimen, kami bekerejasama enggau Palan Servis PRS sereta Opis Pelilih Menua nentuka tetiap ruang bilik nerima ungkup sida,” ku Ugak.