Tagang pengelekai COVID-19 nitihka atur KKM enggau WHO

KUCHING:GerempungGraduet Dayak Sarawak (SDGA) mai sereta meransang mensia mayuh kelebih agi peranak rumah panjai nitihka atur sereta ajar ti dipadahka Opis Menteri Pengerai Malaysia (KKM) enggau World Health Organization (WHO), kena nagang pengelekai COVID19.

Sapit Chairman SDGA, Dr Jawing Chunggat madah, mensia mayuh patut udah ulih mereti ke alai COVID-19 tau nabanka nyawa kelebih agi ngagai ke beumur ngelui 60 taun sereta ke bisi betapi enggau penyakit bukai baka tinggi darah, kemi manis, tungkul ati enggau sakit lempuang.

Nitihku iya, igi penyakit tu ulih diau ba tubuh mensia enda ngira renggat umur, sekalika biak tauka tuai kelimpah ari mensia empu ke ngasuh penyakit tu ngelekai.

“Nya alai ngagai mensia mayuh ke diau di rumah panjai mesti beratika jaku lalau ti dipansutka KKM enggau WHO, iya nya patut jauh ari pangan diri enggau penyauh 1 ngagai 2 meter.

“Ba rumah panjai, ketuka dulu begelumu bebala mayuh. Enti deka berandau di ruai patut duduk jauh ari pangan diri.

Anang bekunsi changkir tauka siduk laban penyakit tu ulih berampit nengah ai liur.

“Kitai mesti ngemeranka pemeresi diri, basu jari ngena chara ti betul, nyema bisi ke pasar meli barang dapur tauka lauk, maya datai dirumah anang enda berumban mandi sebedau begulai enggau diri sebilik,” ku iya nengah penerang berita, kemari.

Dulu ari nya iya madahka igi penyakit COVID-19 jampat ngerampit entara mensia nengah ai ba tubuh baka ari batuk, engkasi, berinsak, ai liur enggau bepegai.

Nya kebuah ku iya, perintah bejalaika Atur Nagang Pemindah ngambika igi penyakit nya enda berampit.

Nambahka nya, iya ti ngarika SDGA mega ngelalau barang sapa ke pulai ke rumah panjai mega patut nitihka atur kuarantin tauka anang mindah ari rumah panjai pengelama 14 hari.

“Enti sesapa bisi kelai penyakit COVID-19, renga, tabin, batuk, berinsak tauka sendat seput, patut lengkas nganjung diri berubat ngagai klinik tauka sepital ke semak,” ku iya ti mega siku ari pemesai perubat Sepital Besai Sarawak.