Kompeni bilun patut madah nyema bisi ubah jam penerebai bilun
Dikena nyeliahka orang tambang napi penanggul kelebih agi lebuh jam penerebai bilun nya bisi diubah tauka dikinsil
MIRI: Kompeni penerebai bilun patut madah tumu ngagai orang tambang ti udah meli tikit bilun ke udah disahka nyema bisi sebarang ubah dalam jam penerebai bilun tauka nyema penerebai bilun nya dikinsil, pia ku Menteri Perengka Pengangkut Datuk Lee Kim Shin.
Ku iya, opis menteri iya nerima mayuh sebana tauka ripot ari mensia mayuh bekaul sekeda penerebai bilun ti udah disahka tang lalu enda nyadi terebai ke alai tu ngenataika penanggul ngagai sida.
“Sida (orang tambang) ti tekeruga ketegal penerebai bilun ti dikinsil pengudah disahka, dekaka kompeni penerebai nya mayar pulai baru ngagai orang tambang berindik ari Atur Nagang Pemindah (PKP) ti mega meri empas ngagai sida kelebih agi ari sukut belanja,” ku iya
Sida (orang tambang) ti tekeruga ketegal penerebai bilun ti dikinsil pengudah disahka, dekaka kompeni penerebai nya mayar pulai baru ngagai orang tambang berindik ari Atur Nagang Pemindah (PKP) ti mega meri empas ngagai sida kelebih agi ari sukut belanja.
Datuk Lee Kim Shin
Menteri Perengka Pengangkut
dalam penerang media ditu, ensana.
Iya ke mega Kaban Kunsil Nengeri (ADUN) Senadin mega ngelalau semua orang tambang ngambika matau enggau silik jam penerebai bilun sida empu ba laman web kompeni penerebai bilun dikena nyeliahka penyarut.
“Kerejasama ari kededua raban nya endang diguna maya tu, kelebih agi enggau gaya menua ti dituntung penusah pandemik COVID19.
“Pia mega, perintah udah neritka atur PKP dikena nagang pengelekai igi penyakit COVID-19.
“Dalam pekara tu mega, endang beguna semua rayat ngasika tetiap jaku tangkan PKP lalu seruran diau ba rumah sida empu,” ku iya nerang.
Ku Lee nambah, ungkup sida ti begunaka pejalai entara bagi menua tauka pelilih, iya nyemetak madahka Komiti Mutarka Penusah Ngenyit Nengeri udah ngaga jaku tangkan bekaul pejalai diatu iya nya rayat patut minta pemendar ari pemesai residen enggau pemesai pelilih di kandang menua sida empu.