PSB Pujut deka bekerejasama enggau JKM nyuaka bantu ngagai komuniti
MIRI: Parti Sarawak Bersatu (PSB) Pampang Pujut deka bekerejasama rat enggau Opis Pengintu Pengelantang Komuniti (JKM) dikena nentuka semua bantu diberi terus ngagai raban ti begunaka nya.
Chairman PSB Pujut Bruce Chai madahka sida deka meri bantu ngagai raban ti bekaul ke udah putus bekal pemakai kenyau ari Atur Nagang Pemindah (PKP) dipejalai.
Nitih ku iya, Komiti Mutar Penusah Ngenyit Nengeri (JPBN) udah minta ngambika semua Gerempung Ukai Dikuasa Perintah (NGO) tauka gerempung bukai patut nengah JKM enti deka meri bantu.
“Semua bantu barang ti diguna besehari-hari deka disuaka ngagai JKM lalu kami ngarapka bantu ti diberi nya datai ngagai komuniti ti kena empas berindik ari pengelekai COVID-19,” ku iya madah ngagai Utusan Borneo kemari.
Ba tuju nya, sida udah ngerintaika nama penerima ti endang patut dibantu lalu disuaka ngagai JKM ke pengawa ti nangkanka nya.
“Kitai merambu JKM nyangka deka napi pananggul kurang pengereja pengawa enggau bantu ti mayuh ari mensia mayuh.
“Beserimbai enggau nya, nyema JKM begunaka volunteer nganjung bantu tauka ke bukai, kami (PSB) Pujut diatu besedia deka nyaup,” ku iya.
Beserimbai enggau nya, sida mega udah nyuaka bantu buah ti diberi ngagai raban pekereja rintai mua di Sepital Miri.
“Kitai udah nyuaka pemeri buah kena 23 Mac tu tadi lalu kitai beterima kasih ngagai Kedai Buah Wang Krokop 10 ti udah ngayanka penyiru meri bantu,” ku iya.
PSB Pujut mega, ku iya nambah, deka merambu nganjung bekal buah ke Sepital Miri tiap dua tauka tiga hari lalu orang bukai mega ulih meri bantu ke sebaka.
“Kitai endang ngelaluka palan bebelika barang, pemurung, orang bekebun tauka orang siku-siku ngaga kereja pengasih tu lalu ulih betelefon ngagai aku ba lumur 0138300001.
“Kitai nyendiaka servis ngambi enggau nganjung bantu nya. Entara ti udah dianjung kami iya nya buah semangka, semangka tusu, epal, nanas enggau pisang,” ku iya.