MDS, bomba udah ngaga Operasyen Sanitasyen ba pasar tamu di Sarikei
SARIKEI: Operasyen Sanitasyen munaska virus udah dipejalaika ba tiga palan iya nya Pasar Tamu Sungai Rejang, Pasar Tamu Sentral enggau Pasar Tamu Sungai Nyelong, lemai kilah ensana.
Operasyen nya udah ngaul kerejasama ari raban Opis Kaunsil Pelilih Menuaa Sarikei sereta mega raban Bomba enggau Penyelamat Sarikei.
Ketuai Opis Bomba enggau Penyelamat Sarikei, Mahmudin Narudin madah, bisi 21 iku ti udah sama dalam operasyen nya.
“Dalam operasyen nya semua pengereja pengawa udah bejalaika kereja sanitasyen enggau chara manchit ngena ai ti dichampur enggau sabun penuchi enggau tikas 1:10.
“Palan ti dipilih iya nya pasar tamu mensia mayuh sereta operasyen munaska virus tu dipejalaika ba sentang dalam sereta mega luar ti ngelingi palan nya.
“Operasyen nya digaga pengelama empat jam lalu udah mujur dipejalaika,” ku Mahmudin.
SIBU: Parti Tindakan Demokratik (DAP) Sarawak minta Kepala Menteri Datuk Patinggi Abang Johari Tun Openg bechuanka perintah besai ti meri agih belanja khas sepenyampau RM100,000 ngagai semua Kaban Kunsil Nengeri (ADUN) dikena mantu rayat di sitak DUN sida empu.
Mandal Chairman DAP Sarawak David Wong nengah penerang media ti dianjung ngena e-mel madahka tu mih maya ti engkeman dikena nyerakupka rayat Sarawak.
“Kepala Menteri patut bechuanka perintah besai ti merika agih belanja khas ngagai semua ADUN ti enda ngira bida politik sida. Nadai maya ti engkeman dikena iya nyerakupka rayat Sarawak.
“Lalu nadai maya ti manah ngena pun penatai pemisi perintah ti meri pemaik ngagai semua,” ku iya nerang.
Wong ke mega ADUN Pelawan madah, politik enda patut nyadika bida diatu laban krisis enda ngelala sereta enda ngira bida politik.
“Mayuh pedaja enggau orang bedagang, kedai mit, bekereja kediri, sakit enggau timpang pendiau, apai indai tunggal sereta orang ti nadai kereja nadai duit galau dalam bank ti chukup pengelama 14 hari agi, bedau agi nyema timpuh Atur Nagang Pemindah (PKP) dilanjar,” ku iya.
Nitihka pansik ti digaga Bank Negara Malaysia ba taun 2017, ku iya, nyauka 73 peratus rayat Malaysia nadai duit galau dalam bank penyampau RM1,000 lalu 32 peratus rayat deka abis duit galau sida dalam timpuh tujuh hari pengudah nadai penatai pemisi sida.
Ku Wong madah, berindik ari PKP ti dilanjar pengelama 14 hari agi, udah tentu tu deka ngeruga peranak sereta mayuh ari sida endang begunaka pemakai enggau barang ti diguna besehari-hari baka tusu nembiak mit, gis enggau nyumai sereta ubat.
Ku iya nambah, pengari rayat patut diberi agih belanja ngambika sida ulih nyaga rayat di sitak pegai sida empu laban enti ngarapka raban ari perintah aja enda chukup nangkup guna rayat.
“Kitai ngembua rizab menua sepenyampau RM30 bilion ke alai rizab tu dikena ungkup jemah ila lalu diatu kitai ditinggang penusah, perintah nengeri mesti ngayanka ngagai rayat iya nya sida nyaga sereta semua rayat Sarawak kitai mega patut dijaga,” ku iya.