KM: Titihka SOP maya ngintu pengerami Gawai Dayak
Tuai Rumah enggau Ketuai Genturung Pendiau dikearap bejalaika tanggungpengawa nentuka SOP dititihka
KUCHING: Rayat nengeri tu, dilalau nitihka prosedur operasyen standard (SOP) pengerami Gawai ke udah ditetap lalu, Tuai Rumah enggau Ketuai Genturung Pendiau dikearap bejalaika tanggungpengawa nentuka SOP dititihka.
Kepala Menteri,Datuk Patinggi Abang Johari Tun Openg madah, laban Gawai taun tu agi dalam timpuh Atur Nagang Pemindah Bisi Penetap (PKPB) ke enda ngemendarka kitai ngatur pengerami Gawai baka taun ke sebedau tu.
“Perintah enda ulih datai lalu meresa tetiap rumah enggau genturung pendiau, tang aku pechaya ketuai genturung pendiau enggau tuai rumah deka seruran nentuka SOP enggau protokol pengerami ti udah ditetapka dititihka semua orang.
“PKPB ti abis timpuh kena 9 Jun enda ngemendarka kitai ngatur pengerami Gawai baka ke ngelama tu. Kitai enda dikemendarka ngatur pengerami nyambut pengabang, enda tau ngabang sereta semina dikemendarka begempuru enggau diri sebilik ti nyadi chara kena nagang pengelekaiCOVID-19.
“Aku amat beterima kasih ngagai semua ke ulih mereti sereta nitihka atur Perintah, ti ngelalau ngambika enda
ngatur nyambut pengabang enggau begempuru enda ngelui ari 20 iku,” ku iya.
Abang Johari madahka pekara nya dalam Jaku Pesan Gawai Dayak 2020.
“Nyerumba pengerami Gawai Dayak taun tu, aku enggau kami sebilik meri Selamat Nyambut Hari Gawai ngagai semua Anak Sarawak bansa Dayak enda ngira dini endur diau,” ku iya.
Maya pengerami baka Hari Gawai, pemadu gaga ati enti begulai enggau diri sebilik ba genturung pendiau tauka rumah panjai, ku iya.
Taja pia ku iya, ke sekali tu engka mayuh ke enda pulai ke menua diri laban Atur nagang Pemindah enda ngemendarka kitai meraka pelilih menua di Sarawak.
“Aku pechaya bisi mega bansa Dayak ke diau ba menua orang ngiga belanja tauka pengidup, kelebih agi dalam industri minyak enggau gis ti mega enda ulih pulai ke Sarawak.
“Enda ngawa, ke pemadu beguna kita enggau kitai semua selamat ari COVID-19. Enti gaya menua kitai udah manah baru baka selama baru kitai ulih begawai enggau berami baka ke sebedau tu.
Kelimpah ari nya, iya madahka igi penyakit COVID19 mai mayuh penusah ngagai mensia mayuh enggau perintah di serata dunya, lalu Perintah Sarawak meretika pekara ti ditapi rayat baka bekaul enggau bekal pemakai enggau kereja.
Iya nemu, mayuh ke makai gaji hari pulai ke genturung pendiau tauka rumah panjai laban gaji enda dibayar pengaji sekumbang dalam timpuh PKP lalu engka bisi sekeda lalu nadai agi kereja.
Kena mantu ngelempungka penusah rayat ku iya, sepenyampau RM16.4 juta udah dibelanja Perintah Sarawak kena nyendiaka bekal pemakai ngagai setengah juta rayat Sarawak.
Bekal barang pemakai ke diguna ninting hari dianjung ngagai rayat sekalika ngena jalai darat, langit enggau sungai, laban deka nentuka rayat bulih bantu bekal nya kelimpah ari perintah ti bebendar nentuka bekal pemakai seruran bisi enggau chukup di serata nengeri.
Nitihku iya, Perintah Sarawak semina sebuah Perintah Nengeri ti nyendiaka bantu ngagai rayat kelimpah ari bantu Perintah
Besai.
“Aku amat ngarapka kita, ketuai ruang bilik, raban pedaja enggau pengempu indutri mit enggau jelan pemesai ke patut bulih bantu, udah nerima tauka minta bantu ti disediaka Perintah Nengeri,” ku iya.
Perintah nengeri bisi nyendiaka Bantu Khas Sarawakku Sayang tauka BKSS 1.0, BKSS 2.0 enggau BKSS 3.0, kena mantu rayat maya napi penusah sekumbang PKP ketegal deka nagang pengelekai COVID-19.
Entara bantu ke diberi nengah BKSS 1.0, 2.0 enggau 3.0 iya nya nyengkaum dibayar mata duit ngagai raban B40 nyengkaum raban orang bujang/dara 21 taun ke atas ti bepenatai pemisi RM2,000 ke baruh; nangguhka bayar duit injau enggau duit injau mudah ti nadai bungai ngagai orang dagang mit enggau tengan pemesai (PKS); enda mayar lisin dagang sereta diskaun suwa bansal endur bejual ngagai raban dagang; bayar insentif ninting bulan ngagai raban rintai mua ti enggau ba pengawa nagang igi penyakit COVID-19 sereta bayar insentif ngagai raban ti nadai penatai pemisi ketegal COVID-19.
Iya ngarapka, bemacham bantu mata duit enggau ukai mata duit ari perintah nengeri, ulih ngelempungka tating penusah rayat kitai ti nadai penatai pemisi sekumbang dalam timpuh PKP enggau PKPB dipejalaika.
“Perintah Sarawak ulih nyendiaka mayuh macham bantu ke diberi ngagai rayat laban perintah nengeri bisi belanja ti tegap berekat ari kitai ngena belanja enggau betul ngelama tu ke udah.
“Gaya politik ti tegap enggau penyerakup pupu bansa sereta jalai pengarap di nengeri, tu udah meri penegap ngagai atur pengawa perintah ti manah sereta meruan. Sarawak bisi rizab duit ti tegut enggau jauh di mua enti dibandingka enggau nengeri bukai.
“Sempama jaku Inggeris, ‘we save for the rainy days’, enggau duit ke digalau ngelama tu ti udah enggau ditambah ninting taun, udah meri kitai pengelantang mimit maya napi penusah” ku iya.
Berebak enggau tu, iya ngelalau rayat ngambika enda mudah tekeruga tauka nitihka aktiviti ti ngembuan peragam ati entara pupu bansa dalam media sosial,ti semina ke tuju politik aja, laban ulah nya tau ngasuh pupu bansa belaya ke lalu tau meri pengerugi ngagai semua.
Ukai muntang nempa penyerakup dalam rayat ti mayuh pupu bansa enggau jalai pengarap ku iya, tang ke udah ditempa ngelama tu, mudah amat tebererak ketegal media sosial ke smudah dikena endur nerenakka pemenchi ba pupu bansa.
“Nyadi rayat Bumi Kenyalang ti seruran deka ke pemaik enggau pengelantang kami amat beterima kasih laban rayat kitai ke mayuh pupu bansa enggau jalai pengarap, ulih ngerami pengerami nitihka jalai pengarap enggau adat diri empu dalam pemaik enggau pengelantang.
“Anang nganggap penyerakup antara rayat kitai nyadi pekara ti mudah aja.
“Ngagai bakih kitai bansa Dayak, aku amat ngarapka semua gaga ati nyambut Gawai taja pan betagang,” ku iya.
Perintah enda ulih datai lalu meresa tetiap rumah enggau genturung pendiau, tang aku pechaya ketuai genturung pendiau enggau tuai rumah deka seruran nentuka SOP enggau protokol pengerami ti udah ditetapka dititihka semua orang.
Datuk Patinggi Abang Johari Tun Openg
Kepala Menteri