Pengerami Gawai Dayak diintu bebida taun tu ngena chara ‘norma’ baru
SIBU: Hari Gawai Dayak sehari tu (Hari Satu) diintu enggau chara ‘norma’ baru, lalu tu endang bebida laban pengerami tu patut diintu nitihka Prosedur Operasyen Standard (SOP) tu udah ditetapka Komiti Mutarka Penusah Ngenyit Nengeri Sarawak (JPBNS).
Berindik ari nya, sekeda komuniti Dayak ba kandang menua tu semina ngintu hari besai nya tengan pemesai (sederhana) aja.
Stanley Bayang, siku pengajar ditu madahka, Hari Gawai taun tu disambut tengan pemesai aja laban aktiviti ngabang enda dikemendarka.
“Chukup mih kitai berami ngintu pengerami tu begulai enggau diri sebilik sereta kaban belayan ke semak aja.
“Kebuah pia, laban pandemik COVID-19 agi bisi lalu kitai patut bejejaga,” ku iya lebuh ditelefon pengarang berita empai lama.
Berebak enggau tu, Stanley madahka iya enggau sida sebilik deka seruran nitihka SOP maya pengerami Gawai
Dayak taun tu.
“Endang amat, Gawai taun tu nyelai agi ari ke udah, tang kitai patut nerima sereta meretika atur perintah.
“Bisi pemanah mega ba norma ke baru tu, baka kitai enda begunaka belanja tauka mansutka duit ti mayuh dikena nyendiaka diri empu nyambut Hari Gawai,” ku iya nambah.
Nangkanka nya, ungkup Flora Jay ke mega siku pekereja kompeni peribit ditu madahka pengerami Hari Gawai Dayak taun tu mai reti ke besai sereta manah ngagai ruang diri sebilik.
“Mayuh orang enda ulih mulaika diri ke menua tauka rumah panjai. Sekeda ari bagi ke besai sida ngintu pengerami tu ba mengeri.
“Taja pia, SOP patut dikemeranka lalu pengawa ngabang enda dikemendarka.
“Ba penemu aku, hari besai taun tu mai reti ke besai lalu ngerapitka kaul begulai enggau diri sebilik sereta kaban belayan ke semak aja,” ku iya.
Taja pan dunya diatu benung dikeruga pandemik COVID-19, tang Flora berasai gaga ati laban Hari Gawai Dayak agi dikemendarka raban JPBNS ngintu pengerami nya, taja semina sehari aja.
“Enda ngawa, taun tu aja kitai napi penusah baka tu, baka enda pulai ke rumah panjai enggau ke bukai.
“Hari Gawai endang diintu, lalu penetap SOP mesti dikemeranka,” ku Flora.
Nambahka nya ku iya, Hari Gawai taun tu deka lebih likun enti ngena chara norma ke baru.
Ku iya, ke pengelikun menua kitai diatu enda ngemendarka Hari Gawai diintu baka taun ke udah.
“Kitai patut nerima semua tu lalu ngintu pengerami Hari Gawai ngena norma baru. Enti ari sukut positif, norma baru tu ngembuan tikas disiplin ke diri empu dikena ngajar kitai semua,” ku Flora nambah.