Raban RemanG ngemeranka konsep ‘Moden/Rock Alternatif’ dalam lagu
SIBU: Raban RemanG seruran mekuh ngemeranka konsep ‘Moden/Rock Alternatif’ ba lagu kedua tauka ‘Single’ pemadu baru sida ke sekali tu, ti diberi nama ‘Tau Nibuh’, apin lama ke udah.
Raban pemerindang (RemanG) tu betuaika Barrow (Drummer) ti beasal ari Kanowit lalu ditangkanka Mathew (Vokalis) enggau Sandah (Gitaris) ari Sibu, Vri Yak (Gitaris)(Kapit) sereta Thomas (Bassis) ari Saratok.
Kena 4 Februari taun tu tadi, lagu ‘Tau Nibuh’ ari raban RemanG tu dipansutka nengah akaun ‘Youtube’ sida empu iya nya ‘RemanG Band’, sereta tiun, leka enggau lagu tu ditengkebang Hayrinton S. William, ke mega orang ti ngempu TWC Studio di Sibu ditu.
Berindik ari nya, raban pemerindang tu madahka sida diatu benung merambu ngaga album keterubah RemanG, ti dipelabaka pansut kena taun 2021 ila.
“Diatu kami udah bisi tiga iti lagu ke udah tembu, nyengkaum lagu ‘single’ keterubah kami suba (Kediri), kedua tu (Tau Nibuh) enggau empat iti lagu ke bukai benung dalam proses.
“Nya alai, kami ngarapka bala peninga ulih nerima konsep ‘Rock Moden’ enggau penyelai tiun ke dibantai raban RemanG nengah lagu,” ku Mathew (Vokalis) madah ngagai pengarang berita ngarika raban sida.
Taja pia, ku iya, kemaya hari tu bemacham penguji ti ditapi raban pemerindang lebuh sida deka ngangkatka industri muzik, tebal agi bala penanyi tauka penengkebang lagu kitai Iban ba nengeri tu.
Kelimpah ari nya, kerejasama enggau sukung ti besai ari bala peninga endang chukup beguna dikena nentuka industri muzik Iban seruran teguh sereta asil pengawa raban pemerindang enda tebasau pia aja.
“Penanggul ti balat ngeruga industri muzik kitai kemaya hari tu iya nya VCD/DVD chelak tiru. Endang mar alai kitai nagang pengawa ti ngelanggar undang-undang tu.
“Nya alai, ungkup album ke dijual ngena VCD/DVD, bala peninga tauka peminat patut landik milih sereta meli iya ke chulin. Enti nengah platform digital tauka media rama ‘Youtube’, sida patut ‘subscribe’ akaun nya lalu mantaika (share) lagu nya ngena chara ke betul.
“Tu mih chara ke betul dikena kitai nyukung sereta nulung raban pemerindang enggau industri muzik Iban, ngambika kami ulih nengkebang lalu mansutka lagu ti baru dudi hari ila,” ku iya.
Ke penemu rama, lagu Tau Nibuh ari raban RemanG tu mega udah mujur dichalun dalam carta ‘Cats XposedEthnic Division’.
“Kami raban RemanG, ngarapka muzik kitai Iban seruran mansang ke mua, ari sukut kualiti tiun, rentak enggau ke bukai.
“Nambahka nya, ngarapka bala peninga enggau peminat ulih nerima muzik sereta seruran nyukung raban kami dalam industri tu,” ku iya nambah.