Kes rabies ketegal kurang kerejasama ari mensia mayuh, ku Dr Annuar
SIBU: Menteri Muda Kaunsil Kandang Menua enggau Pengawa Berumah Dr Annuar Rapaee madahka diri irau ati bekaul enggau kes rabies ti bisi nyadi ba taun tu, laban nya nandaka kurang kerejasama ari mensia mayuh dalam pengawa ngemunaska penyakit Rabies.
Nitih ku iya, raban ke bekuasa udah bebendar ngatur bemacham pengawa dikena mutarka penanggul tu ari ti majak nyadi, kenyau penyakit nya diripotka bisi di Sarawak kena bulan Julai 2017 suba.
Nambahka nya, Opis Veterinar mega udah mantaika 10 buah palan di Sibu ti bisi ukui ke positif rabies.
“Bisi dua kes Rabies ti bekaul enggau peranak ba Sibu taun tu. Keterubah suba iya nya kena 8 Mac, siku nembiak indu ke beumur lima taun ba Jalai Sentosa ditu, diketup ukui lelang ba mua, mulut enggau selepak mata iya.
“Opis Menteri Pengerai udah ngeripotka pemati nembiak indu nya kena 26 Mac nyin tadi ketegal Rabies. Ke pemadu baru iya nya siku nembiak mit lelaki ke beumur lima taun mega diketup jelu tupi sida sebilik di genturung pendiau ba Jalai Sanhill Barat ditu.
“Diatu kitai benung betapi ngelaban pandemik COVID19, lalu bisi mega penyakit ke bukai ti patut diputarka. Nya kebuah kami minta kerejasama ari mensia mayuh,” ku Dr Annuar ke mega nyadi Ketuai Raban Penagang Rabies Sibu, kilah ensanus.
Berindik ari tu, iya mega ngelalau pengempu ukui tupi ngambika enda ngelakka ukui sida bekedayau ba luar.
Dr Annuar ke mega Menteri Muda Pelajar, Sains enggau Pansik Teknologi madahka ukui ke ditupi ba dalam rumah mega ulih kena rampit penyakit tu. Kebuah pia, ukui lelang ulih ngerampit ukui tupi nya nengah taring lebuh sida belaya enggau pangan diri.
Senentang pekara tu, Dr Annuar ke mega Kaban Kunsil Nengeri (ADUN) Nangka ngansak sida ti nupi ukui enggau mayau ngambika diberi vaksin setaun sekali.
“Anang nganti raban ke bekuasa datai ke rumah ke kita ngaduka pengawa vaksinasyen. Ngagai raban pengempu jelu tupi, nuan patut bisi tanggungpengawa nyaga jelu tupi kita empu,” ku iya.
Berindik ari nya, ari perati iya, bisi sekeda ukui bekedayau ba kedai kupi di kandang mengeri tu, laban ti makai laluh pemakai ba endur nya.
Nya alai, Dr Annuar ngelalau mensia mayuh ngambika enda meri pemakai ngagai ukui lelang nya.
Kelimpah ari nya, iya mega bisi mesan, sesapa ke bisi diketup ukui, orang nya mesti nuchi abi telih sida lalu lengkas berubat ngagai sepital.
“Anang ngambi mudah sentang pekara tu sereta melabaka nya semina telih mit aja, lalu madah enda ibuh dianjung ke sepital.
“Kebuah pia, virus nya ulih ngelaban ‘saraf’ enggau untak kitai. Ingat mih, anang enda bejejaga,” ku Dr Annuar.
Berebak enggau nya, iya madahka raban sida deka ngatur aum bekaul enggau operasyen ke besai, ti deka diatur sida dikena nangkap ukui ti bekedayau ba luar tauka ba palan mensia mayuh.
“Sebaka enggau chara dikena kitai ngelaban COVID-19, kerejasama ari semua raban endang beguna amat ngambika penyakit rabies tu ulih dipunaska. Enti nadai kerejasama ari mensia mayuh, pengawa ti deka meresi palan endur rabies, deka puntan ngapa,” ku iya nambah.