Mayuh agi sektor ekonomi di Sarawak deka dibuka sebedau 9 Jun

KUCHING: Mayuh agi sektor ekonomi di Sarawak deka dibuka sebedau Atur Nagang Pemindah Nitihka Penetap (PKPB) abis kena 9 Jun tu, ku Sapit Kepala Menteri Datuk Amar Douglas Uggah Embas.

Ku iya, aum Komiti Mutarka Penusah Ngenyit Nengeri Sarawak (JPBNS) ti betuaika iya sehari tu (kemari) berandauka bansa sektor ekonomi nya berindik ari gaya COVID-19 ti belinsur manah.

“PKPB (sentang tanya ngelanjarka atur) nya bepanggai ba Kuala Lumpur ( Perintah Besai), tang udah tentu kitai di Sarawak deka muka mayuh agi sektor ekonomi sebedau 9 Jun tu,” ku iya maya dikerandau Utusan Borneo, kemari.

Pengawa tu ku iya berindik ari pengasi sektor ekonomi udah dibuka ti dipeda iya amat ngemuaska ati nitihka udah dikemata raban iya.

“Sektor ekonomi dipeda endang nitihka Prosedur Operasyen Standard (SOP) ti udah ditetapka laban kami beratika sida ngemeratka tikas pengerai, ukai semina nitihka nya ketegal undangundang,” ku iya nerang.

Sekeda sektor ekonomi di Sarawak dibuka kenyau 12 Mei, maya ditutup kenyau PKP diteritka berengkah 18 Mac nyin tadi.

Kemar,i iya nya hari keenam bejurut nadai kes COVID-19 baru dirikodka di Sarawak.

Berebak enggau nya, Uggah endang puas ati ba pemujur atur nagang pengelekai igi penyakit COVID-19 ke diatu mandangka penyampau kes nurun mengkang 552 kes kemari.

Atur nagang COVID-19 tu baka kuarantin peranak Sarawak ti pulai ari luar nengeri, nagang penama orang menua luar sekumbang bulan Februari 2020, nadai pengerami besai beserimbai Aidilfitri enggau Gawai sereta enda dikemendar pemindah entara pelilih menua.

Ku iya, pemujur nurunka kes baru ukai ari perintah aja, tang asil ari kerejesama rayat Sarawak ti amat ngasika atur bekaul enggau nagang pengelekai COVID-19.

“Kami pechaya, kitai ba singkang ke betul dalam nagang pengelekai COVID-19. Kami minta ngambika rayat seruran ngemeranka disiplin tinggi, nyaga pemeresi enggau seraka sosial,” ku iya.