Kedai nyual lumur (4D) dikemendarka beoperasyen berengkah ari 19 Jun
KUCHING: Kedai nyual lumur (4D) ti bisi lisin tauka bisi pemendar ari Opis Menteri Wang dikemendarka beoperasyen berengkah ari 19 Jun 2020 (Hari Lima).
Sapit Kepala Menteri, Datuk Amar Douglas Uggah Embas madahka, operator tauka kedai nya patut nitihka garis lalau ke udah ditetapka.
“Kedai nyual lumur (4D) ti udah diberi Opis Menteri Wang lisin dikemendarka beoperasyen berengkah 19 Jun 2020 (Hari Lima) bepanggai ba pengulih nitihka garis Lalau ke udah ditetapka,” ku iya Uggah ti nyebut entara pemutus ke udah digaga Komiti Mutarka Penusah Ngenyit Nengeri Sarawak (JPBN) kemari.
Uggah ti mega Chairman JPBN mantaika pekara nya ba aum pengarang berita COVID-19 Sarawak ti diatur ba Bangunan DUN Lama ditu, kemari.
Nambahka nya ku iya , JPBN udah ngaga pemutus ngemendarka Pasar Malam/ Pasar Siang / Pasar Minggu beoperasyen berengkah 20 Jun 2020.
“Nya alai lebuh kitai mega majak mayuh sektor ekonomi dibuka, aku ngarapka mensia mayuh enda ngerunding tauka ngumbai gaya ba nengeri kitai diatu likun.
“Kitai enda ulih madah baka nya, nya kebuah semua aktiviti ekonomi tu dikemendarka beoperasyen ngambika ulih mutarka isu ekonomi maya dalam PKP suba.
“Tang dalam timpuh ke sama mega kitai patut ngemeratka isu pengerai, nya kebuah pengulih nitihka SOP beguna amat, taja pan mar asai tang amat beguna laban lebuh kitai meda rayat di Sarawak kitai ulih ngatur bepanggai ba disiplin rayat,” ku iya.
Uggah ngarapka disiplin nya ulih dipajakka awakka lebuh datai ba 31 Ogos, Sarawak ulih mutarka semua sereta menang perang.
Dulu ari nya iya, madahka JPBN mega bisi nerima sekeda prosedur operasyen standard (SOP) pemadu baru ti udah disedia ngambika diaku, ku iya.
Ku iya, pesereta MM2H (Malaysia Rumah Kedua Ku) ke udah ba Malaysia maya Atur Nagang pemindah (PKP), sereta udah nengah proses kuarantin enggau beperesa COVID-19, dikemendarka tama ke Sarawak sereta enda ibuh dikuarantin baru.
“Tu ubah ngagai SOP ke sebedau tu, nya kebuah pesereta MM2H tau tama ke Sarawak enggau enda ibuh dikuarantin,” ku iya.
Nambahka nya, iya mega madahka Bas Ekspres, Bas Ngetu- Ngetu ulih beoperasyen enggau kapasiti 100 peratus berengkah 17 Jun 2020 (kemari) lalu garis lalau ti silik tau dipeda ba Opis Menteri Perengka Pengangkutt Sarawak.
Bekaul enggau sekula ti deka dibuka baru baka ke dipadahka Opis Menteri
Pelajar , iya nya kena 24 Jun 2020, ku iya, JPBN udah ngemedarka bas enggau van sekula beoperasyen.
“Bas enggau van sekula dikemendarka beoperasyen enggau kapaisiti 100 peratus bepanggai ba pengulih nitihka Garis Lalau ti udah dipansutka Opis Menteri Pengangkut Sarawak,” ku iya.
Kelimpah ari nya, Uggah madahka bisi siti operasyen iya nya ‘Operasyen Benteng’ (Op Benteng), lalu tuju operasyen tu iya nya dikena nentuka orang ari menua luar enda tau tama ke Nengeri Sarawak.
“Tu beguna amat laban ba sekeda kes ke sebedau tu iya nya kes import, nya kebuah kitai patut bejejaga.
“Lalu Perintah Besai udah ngaga pemutuska bejalaika siti operasyen, iya nya Operaysen Benteng lalu dalam operasyen tu bisi enam (6) endur bejalaika pengawa ngempang jalai alun iya nya di Lundu, Bau, Padawan, Serian, Sri Aman enggau Lubok Antu lalu penyampau raban ke enggau bisi 105 iku.
“Naka sehari tu bisi 1,137 iku perengka pengangkut udah diperesa sereta nadai orang ke ditangkap diripotka,” ku iya.