Sarawak ngerikodka siti kes positif COVID-19 kemari
KUCHING: Bisi siti kes baru positif COVID-19 dirikodka di Sarawak, ti diripotka ba Bintulu sereta dikelala nyadi kluster baru iya nya kemari sereta nya nyadi kluster baru iya nya Kluster Ruang Bilik.
Sapit Kepala Menteri, Datuk Amar Douglas Uggah Embas madah, nya nyadika penyampau kes positif di Sarawak naka ke diatu bisi 561 kes.
“Sehari tu (Kemari) bisi siti agi kes positif COVID19 baru. Kes nya diripotka ari Pelilih Menua Bintulu iya nya sama diri sebilik asil ari pengawa meresa enggau nyidi ‘kontak’ kes ti ke-557.
“Kes positif ke diripotka di Bintulu iya nya kluster baru ti dikumbai Kluster Ruang Bilik.
“Opis Pengerai Nengeri Sarawak deka terus ngiga kontak sereta deka ngemata lalu nyema bisi pematut nya baru kitai bejalaika Nyidi Kes Aktif (ACD). Nyentuk ke diatu bedau bisi sebarang pemutus digaga bekaul enggau pekara nya,” ku iya.
Uggah madahka pekara nya ba aum pengarang berita COVID-19 Sarawak ti diatur ba Begunan DUN Lama ditu, kemari.
Nitihku iya, kes di Bintulu asil ari pengawa bejalaika meresa semua nembiak Institut Pelajar Tinggi Perintah enggau Peribit (IPTS/S) dalam Sarawak ke pulai ke menua, berindik ari bisi siti kes bekaul enggau siku nembiak IPTS, iya nya nembiak ari I-System Kuching ditemu positif.
Nambahka nya, iya madahka kemari nadai kes baru ti gerai sereta dikemendarka pansut ari sepital, lalu tu nyadika penyampau semua kes positif COVID-19 ke udah gerai enggai dikemendarka pansut ari sepital mengkang 534 iku tauka 95.19 peratus.
Penyampau ke agi diperubat ba sepital bisi sepuluh iku lalu penyampau kes pemati mengkang 17 iku.
“Bisi 17 PUI baru diripotka enggau bisi 11 kes agi nganti pemutus makmal,” ku iya.
Kemari mega bisi 43 iku Person Under Surveillance (PUS) udah ngerejista diri tama hotel sereta dikuarantin, ti nyadika penyampau semua PUS ba 12 hotel di serata Sarawak bisi 648 iku.
Sama bisi ba aum pengarang berita nya kemari, Menteri Kaunsil Kandang Menua enggau Pengawa Berumah Dato Sri Dr. Sim Kui Hian sereta sida ke bukai.