Semilan JKKK nerima geran RM29,000 ari Harden

SRI AMAN: Bisi semilan Komiti Pemansang enggau Pengelikun Genturung Pendiau (JKKK) di Batu Lintang, Undop ba sitak Kunsil Nengeri (DUN) Simanggang nerima geran ari perintah beungkus RM29,000 ditu kemari.

JKKK tu iya nya ari JKKK Rumah (Rh) Jalie Tutong di Ijok, Rh Sanggau di Sungai (Sg) Reboh, Rh Tuang di Sg Labi, Rh Victoria di Rampu Wie, Rh Bericha di Temiang Baru, Rh Kuti di Sg Nunggang Temiang, Rh Jubang di Temiang Jambatan, enggau Rh Janyun di Temiang Asal, sama nerima RM3,000.

JKKK Rumah Mingging di

Munggu Ruan nerima geran RM5,000.

Dulu ari nya, ba pengawa mit pengawa nyuaka geran nya, Menteri Muda Pengintu Pengelantang komuniti Sarawak ke mega ADUN Simanggang, Datuk Francis Harden Hollis di Rh Bericha ngarapka geran ti diberi nya tau dikena enggau manah ke tuju pemansang ba rumah panjai sida.

“Nyadi siku pengari rayat ti bisi tangggungpengawa ba sitak tu, aku deka meda tetiap geran ti diberi perintah dikena enggau manah.

“Geran tu sekalika ungkup pemansang rumah panjai tauka kena ngatur aktiviti ti ulih meri penguntung ngagai semua peranak rumah panjai enggau JKKK ke bekaul,” ku iya nyemetak.

“Ukai semina kena ngatur aktiviti JKKK, duit turu tu mega tau dikena ke perais peransang ngagai anak ti nyulut dalam pelajar sida enggau ke bukai.

“Gaga mih perambu ti tumu baka ni chara deka melanja geran tu ngambika datai ngagai raban ti ditagit sereta meri pemaik ngagai semua peranak ba rumah panjai,” ku iya baru.

Sama bisi datai Sapit Ketuai Kunsil Opis Pelilih Menua Sri Aman Kunsilor Andar Suntai enggai kaban Parti Sa’Ati Rayat Sarawak (SUPP) Pampang Simanggang.