Raban Rockschool mansutka lagu ‘single’, Nuan Ukai Ungkup Aku
SIBU: Taja pan Atur Nagang Pemindah (PKP) udah dipejalaika perintah kenyau ari 18 Mac empai lama, tang nya ukai nyadika penanggul ngagai raban pemerindang ‘Rockschool’ mansutka lagu ‘single’ ke pemadu baru ari sida iya, ti diberi nama ‘Nuan Ukai Ungkup Aku’.
Lagu ‘Nuan Ukai Ungkup Aku’ mujur dipansutka raban pemerindang tu nengah akaun media rama ‘Youtube’ sida empu iya nya ‘Rockschool Band Official’ kena 12 Mei 2020, lalu lagu tu mega udah dipeda mensia mayuh penyampau 44,721, dalam kandang sebulan lebih tu.
Raban Rockschool diarika 6 iku raban iya nya Rizal (Bassis) ke mega ketuai raban pemerindang tu, lalu ditangkan ke Beritin Empawi(gitaris), Lyister (Vokalis), Edward James (Gitaris), Nemo (Drummer) enggau Agah (Keyboardis).
Nyidi enggau silik agi pasal lagu baru raban Rockschool tu, leka sereta tiun lagu nya ditengkebang Beritin begulai enggau siku penanyi tebilang iban iya nya Tony Engkabi, lalu muzik video (MTV) tu digaga Herbert Ujan.
Berindik ari nya, ketegal ngasika atur PKP enggau empas pandemik Covid-19 ti nyadi di menua tu, raban Rockschool tetap chakah sereta netapka bala sida semina ngerikod video lagu nya ba rumah diri empu.
“Muzik video kami ke sekali tu digaga sekumbang timpuh PKP dipejalaika, nya alai kami netapka diri ngerikod MTV tu ba rumah diri empu aja.
“Sekeda video dalam lagu tu diambi ba menua Maldives, sebedau Malaysia napi atur PKP suba. Berindik ari tu, kami ari raban Rockschool meri besai terima kasih ngagai Herbert Ujan laban udah mujur ngaduka MTV kami tu enggau manah,” ku Rizal ngari ke raban sida madah ngagai pengarang berita Utusan Borneoseraya madahka muzik lagu tu ditengkebang Maxwell John Pagang sereta pengeluar nya ‘Jelai Music Production’.
Ke penemu rama, raban Rockschool tu ditumbuhka ba taun 2010 lalu maya nya sida semina diarika tiga iku raban aja nyengkaum Rizal empu. Kena taun 2014, sida mansutka lagu single keterubah iya nya ‘Ambai Diambi Pulai’, lalu penyampau orang ke udah meda sereta ninga lagu nya, ungkup ke diatu iya nya nyau deka semak sejuta ba Youtube.
Nangkanka tu, bisi mega sekeda lagu raban Rockschool ke bukai baka ‘Taja Ukai Aku’ enggau ‘Kaban Ati Ari’ , lalu ungkup ke diatu sida udah nembuka tiga iti lagu baru ke bukai iya nya ‘Ampun’, ‘Keran’ enggau ‘Telai Dalam Atiku’.
Ku Rizal, taja pan raban Rockschool suah besilih orang, tang berekat sukung ari diri sebilik, bala kaban enggau bala peminat sida, iya enda putus pengarap sereta neruska pengawa ngemansangka industri muzik peranak menua.
Berebak enggau tu, raban Rockschool meri terima kasih besai ngagai bala peminat ti enda badu nyukung pejalai raban sida ba dalam dunya pemerindang, kenyau ari taun 2010.
“Kami mega meri terima kasih ngagai diri sebilik enggau bala kaban ke bukai, laban udah semampai begulai sereta nyukung kami maya tusah enggau senang.
“Enggau peluang tu mega, kami deka ngelalau mensia mayuh ngambika bela nyaga pengerai diri empu sereta ngemeranka atur SOP (prosedur operasyen standard), baka ngena sengakabung idung enggau mulut, seruran nuchi jari, nyaga pemeresi tubuh diri empu enggau nyaga seraka sosial,” ku iya.
Nambahka nya, mensia mayuh ke deka nemu pemansang sereta berita pasal raban Rockschool ba dunya pemerindang, tau ngelawa akaun ‘Facebook’ (Rockschool) enggau ba Youtube (Rockschool Official Band) sida.