MINTRED nerima belanja tambah RM5j ungkup pedagang di Sarawak
Belanja tambah tu udah diberi ngagai SEDC ungkup USTEV, GERAK
KUCHING: Opis Menteri Dagang Antarabansa enggau Industri, Terminal Industri enggau Pemansang orang Dagang (MINTRED) nerima belanja tambah sepenyampau RM5 juta dikena mantu orang dagang nengeri tu.
“Laban nyau deka semua agih belanja tu diberi ngagai orang dagang mit, nyadi Kepala Menteri Datuk Patinggi Abang Johari Tun Openg udah ngemendarka belanja tambah RM5 juta baru ungkup program ke sama. ”
Datuk Mohd Naroden Majais
Menteri Muda MINTRED
Menteri Muda MINTRED, Datuk Mohd Naroden Majais madahka, pemeri belanja tambah nya diberi ngagai Kaunsil Pemansang Ekonomi Sarawak (SEDC) ungkup Program Orang Dagang Teknikal enggau Vokasional (USTEV) enggau Program Graduet Nyadi
Orang Dagang (GERAK).
Bedau lama ti udah, ku iya, program nya udah nerima belanja sepenyampau RM4 juta ungkup semua tang enda chukup pengudah nerima sambut ti chukup manah ari orang dagang kelebih agi maya musim COVID-19.
“Program USTEV enggau GERAK bepun enggau agih belanja bela sama sepenyampau RM2 juta.
“Laban nyau deka semua agih belanja tu diberi ngagai orang dagang mit, nyadi Kepala Menteri Datuk Patinggi Abang Johari Tun Openg udah ngemendarka belanja tambah RM5 juta baru ungkup program ke sama,” ku iya.
Iya madah munyi nya maya dikerandaupengudahpengawa nyuaka surat terima ngagai 39 pesereta Program USTEV, GERAK enggau Skim Pinjau Industri Mit enggau Tengan Pemesai Sarawak (SPIKS) di Menara SEDC, Kuching Isthmus ditu, kemari.
Naroden mega madah Unit Perambu Ekonomi (EPU) ari baruh Opis Kepala Menteri udah setuju deka meri belanja tambah tu.
“Nyadi, aku deka meransang lebih agi orang dagang mit ari raban mikro ngambi minta bantu tu laban kami bisi nyendiaka bantu tambah kena mantu nampung ungkus dagang sida.
“Orang dagang ulih minta bantu tu nengah ‘online’ ba laman web SEDC tauka MINTRED,” ku iya seraya madah raban sida bisi komiti deka mansik sereta ngemendarka peminta nya.
Iya ngarap orang dagang deka ngena bantu ti disediaka perintah Sarawak enggau memanah kelimpah ngelalau sida ngulih lalau ari MINTRED enggau SEDC enti bisi napi penanggul ari sukut bayar baru skim nya.
Dulu agi ari tu maya bejaku ba pengawa nya, Naroden ngansak orang dagang dalam pedagang mit enggau tengan pemesai (PKS) ngambi minta bantu nengah SPIKS.
Tu laban ku iya, skim nya bisi nyendiaka penyampau pinjau maksimum nyentuk RM250,000 enggau tikas bayar bungai iya nya empat peratus nitihka konsep laluh kira nya.
Sama bisi datai ba pengawa nya Menija Besai SEDC Abdul Hadi Datuk Abdul Kadir.