MANRED mantu pekebun lada enggau getah di Betong: Uggah
BETONG: Opis Gerempung Orang Bekebun Betong (PPB) deka diberi injin kena proses lada ungkup guna pekebun komoditi nya kelebih agi ba kandang menua tu.
Sapit Kepala Menteri Datuk Amar Douglas Uggah Embas madahka Opis Betanam Betupi Bagi Menua ditu mega deka diangkatmanah ungkup tuju nya.
Injin dikena proses lada tu, ku iya, deka disediaka Opis Menteri Betanam Betupi Moden, Tanah Adat enggau Pemansang Kandang Menua (MANRED).
Iya madah munyi nya lebuh ti bejadika Program Lanjutan Jangkauan Komuniti Opis Betanam Betupi ba Rumah Jambai Bunsi, Kerapa Spak ditu, kilah ensana.
Uggah ke mega Menteri Betanam Betupi Moden, Tanah Adat enggau Pemansang Kandang Menua madahka Betong entara pengeluar lada ti pemadu mayuh di nengeri tu.
“Mayuh pekebun ditu agi terus ngintu kebun sida taja pan rega lada diatu bisi nurun. Tu pekara ti manah ungkup industri tu.
“Gerempung Pekebun di kandang menua deka meli asil lada kita (pekebun) ba rega ti engkeman taja pan lebuh rega lada bisi nurun.
“Nya deka diproses lalu lada ti udah diproses nya deka dibungkus ngena teknologi moden ngambika kualiti nya agi tan lebuh dieksport ke Singapura enggau menua Eropah,” ku iya.
Uggah madahka nya entara chara perintah mantu raban pekebun lada di nengeri tu.
“Aku mega mutuska opis menteri aku (MANRED) meri subsidi ngagai tetiap ruang bilik pekebun ditu, iya nya RM2,000 ungkup baja dalam taun tu.
“Penyampau tu nyangka enda chukup tang nya deka mantu sida (pekebun) ngurangka ungkus ngintu (kebun),” ku iya.
Bekaul getah, Uggah madah bisi urung 1,300 hektar kebuh getah di bagi menua nya.
“Aku pechaya pun getah ti udah tuai, ke enda agi ngemansutka asil ulih nyadi pun penatai pemisi ke bukai.
“Kitai ulih nebang pun kayu getah ke guna industri kereban berumah. Bisi kompeni ti rindu ke nya.
“Aku patut berandau enggau Kepala Menteri Datuk Patinggi Abang Johari Tun Openg deka minta pemendar ari iya,” ku iya.
Ba pekara ke bukai, Uggah nangkan rayat ngambika enda tepejuh tauka saru penemu enggau politik ‘langau’ ti nusi berita selebubu ngapa enggau petenah.
Iya madah, kelimpah ngutuk ketuai diatu ba kandang menua nya, ti madahka enda efektif lalu semina nyaga pemerat kaban sida, ‘langau ti dipadahka nya deka meri mayuh macham semaya.
“Pengudah pengawa bepilih nyema sida alah, sida lalu terebai lari baka nya aja,” ku iya nambah.
Beserimbai enggau nya, ex Sapit Kepala Menteri Datuk Patinggi Tan Sri Alfred Jabu Numpang ti bejaku ba pengerami nya, madahka Uggah endang engkeman nyadi penganti iya mega Betong.
“Kebendar, diatu iya (Uggah) Sapit Kepala Menteri lalu megai portfolio ti pemadu beguna di Sarawak iya nya Menteri Betanam Betupi Moden, Tanah Adat enggau Pemansang Kandang Menua, ti mega Menteri Pekara Wang Kedua ke ngayanka kreadibiliti enggau kualiti iya.
“Iya udah bejalaika pengawa enggau pemadu manah sekali. Bagi Menua Betong benung ngasaika pemansang ti enda tekeruga lalu endang jampat sereta inklusif diatu.
“Aku pechaya ari baruh perintah GPS (Gabungan Parti Sarawak) mayuh agi pemansang deka dipejalai ditu kelebih agi ngerembaika potensial sektor betanam betupi,” ku iya.
Berindik ari nya, Jabu mesan rayat sekali agi meri sukung penuh ngagai Uggah dalam ngetanka sitak Bukit Saban maya Pengawa Bepilih Nengeri (PRN) ti deka datai.
Sama bisi datai ADUN Layar Gerald Rentap Jabu, Sekretari Mendam MANRED Edwin Abit, Sekretari Politik Kepala Menteri Dr Richard Rapu enggau Residen Betong Friday Belik.