Nadai kes baru positif COVID-19 diripotka di Sarawak kemari

KUCHING: Sarawak nadai ngerikodka kes baru positif COVID-19 kemari ti nyadika penyampau semua kes positif mengkang 682 kes.

Komiti Mutarka Penusah Ngenyit Nengeri Sarawak (JPBNS) dalam penerang media mega madahka nadai kes baru ti udah gerai sereta dikemendarka pansut ari sepital kemari.

Tu nyadika penyampau kes positif ti udah gerai sereta dikemendarka pansut ari sepital naka kemari bisi 659 iku tauka 96.63 peratus.

“Bisi empat iku agi diperubat iya nya tiga ba Sepital

Besai Sarawak (HUS) lalu siku ba Sepital Sibu.

“Sehari tu (Kemari) mega bisi dua kes orang dipelaba (PUI) baru diripot lalu siti kes agi nganti pemutus makmal.

“Pia mega bisi 148 iku orang ti dikemata (PUS) udah ngerejista tama ke hotel lalu dikuarantin,” ku iya.

JPBNS mega madahka tujuh kluster agi aktif iya nya Kluster Syarikat Kejuruteraan (lapan kes), Kluster Mambong (tujuh kes), Kluster Pasar Stutong (tujuh kes), Kluster Sentosa (31 kes), Kluster PUI Melbourne (tiga kes), Kluster Syarikat Pembinaan Kuching (dua kes) sereta Kluster Pasar Satok (empat kes).

Bekaul pengawa matau tikas pengasi Atur Nagang Pemindah Mulaika Pemanah (PKPP), Polis Sarawak udah ngemansutka semilan notis kompaun laban enda nitihka Prosedur Operasyen Standard (SOP).

Notis kompaun ti dipansutka nya ba Miri (2), Padawan (2), Limbang (2), Kuching (1), Kota Samarahan (1) enggau Betong (1).

Pia mega, bisi 1,742 premis dipatau ti ngaul palan bebelika barang, restoran, kilang, bank, opis perintah, orang bedagang, pasar tamu mensia mayuh, palan besembiang, palan rekreasyen, palan begagaka rumah enggau ke bukai.

Enam pengawa ngempang jalai bisi mega diatur beserimbai enggau ‘Op Benteng’ ba Lundu, Bau, Serian, Sri Aman enggau Lubok Antu lalu bisi 779 perengka pengangkut udah diperesa.

Mensia mayuh terus dipinta ngambika enda terundarunda lalu terus bejejaga sereta tentuka jaku tangkan pengerai dikemeranka ninting maya.