PRS nyukung SUPP ngerebut kerusi DUN Engkilili ari penyakal ba PRN12
KUCHING: Parti Rakyat Sarawak (PRS) meri sukung penuh ngagai Parti Sa’ati Rayat Sarawak (SUPP) ngerebut kerusi Kunsil Nengeri (DUN) Engkilili ari penyakal maya Pengawa Bepilih Nengeri (PRN) ti ditimpuhka deka diatur ba tengan taun 2021.
Presiden PRS, Tan Sri Datuk Amar Dr James Jemut Masing madah sida meri sukung nya laban sebedau tu SUPP udah nyukung sida maya ngeletakka chalun ungkup kerusi Parlimen Lubok Antu maya Pengawa Bepilih 2018 nyin suba.
“Ari asal, Lubok Antu enggau Engkilili nya endang kerusi ti diungkup ngagai PRS enggau SUPP.
“Kededua PRS enggau SUPP iya nya parti komponen Gabungan Parti Sarawak (GPS) ke mega parti gempung ti ketuai dalam nengeri tu,” ku Masing dalam siti penerang pengudah bejalai ngabas ngagai Rh Sirai di Engkilili kemari.
GPS ku iya komponen Parti Pesaka Bumiputera Bersatu (PBB), PRS, SUPP enggau Parti Demokratik Progresif (PDP) ke mega sebagi ari Barisan Nasional (BN) sebedau tu suba ti udah lenyau kuasa ngagai Pakatan Harapan (PH) maya pengawa bepilih besai 2018 suba.
Dua kerusi DUN ari baruh sitak Parlimen Lubok Antu iya nya Engkilili enggau Batang Ai ti dipegai PRS.
“Maya Pengawa Bepilih Besai ke-14 (PRN14), PRS lenyau 1,050 undi di Engkilili.
“Tebal agi pelilih endur ngundi (ungkup Lubok Antu) ke alai BN alah iya nya kubu kuat SUPP.
“Reti tu sekalika ketuai SUPP enda chukup bebendar nyukung BN (maya nya) tauka bisi isu chara ke enda manah ari parti komponen BN ti maya nya ngelaban PRS,” ku Masing.
Menteri Pemansang Infrastruktur
enggau Palan Penyangkai Kapal nya irau enti pengawa nya majak nyadi, GPS engka deka napi pemar di Engkilili maya pengawa bepilih ke-12 ila ti dipelaba deka nyadi dalam timpuh ke semak tu.
“PRS deka bepegai rat ngagai semaya kami ti nyukung SUPP/GPS lalu nyadika balas nya, kami deka SUPP nyukung chalun kami di Lubok Antu ti nadai ngembuan agenda bukai baka ti nyadi maya PRU14,” ku Masing.
Sama bisi datai ba pengawa nya nyengkaum Presiden SUPP, Dato Sri Dr Sim Kui Hian, ke mega Menteri Kaunsil Kandang Menua enggau Pengawa Berumah, Menteri Muda Raban Nembiak Lumba enggau Main, Datuk Snowdan Lawan, Menteri Muda Dagang Antarabansa enggau Industri, Terminal Industri enggau Pemansang Orang Dagang Malcolm Mussen Lamoh, Kaban Kunsil Nengeri (ADUN) Bukit Begunan, Datuk Mong Dagang enggau Chairman PRS pampang Engkilili Roy Gingkoi.
Ba pengawa nya, Masing bisi ngungkupka RM20,000, Malcolm enggau Dr Sim sama bela meri RM10,000 enggau RM6,000 ngagai Rh Sirai dikena nyemin jalai kaki ke rumah panjai nya.
Maya PRU 2018, chalun ngatika diri, Jugah Muyang ngerebut Lubok Antu ari BN/ PRS dalam pengawa bepilih tiga penjuru pengudah bulih sepenyampau 5,834 undi ngagai chalun BN Robert Pasang Alam enggau chalun PH Nicholas Bawin Anggat, ke bulih 4,775 undi enggau 3,942 undi.
Maya pengawa bepilih nengeri 2016, chalun ari BN, Dr Johnichal Rayong Ngipa menang ngetanka sitak Engkilili ba pengawa bepiliih empat penjuru enggau chalun Parti Keadilan Rayat Nicholas Bawin Anggat sereta dua iku agi chalun Ngatika Diri Risi Bauk enggau Adan Sandom.
Rayong, ke bulih 5,513 undi menang ba pengawa bepilih nya enggau majoriti 3,857 undi. Iya diatu udah nyereta nyadi kaban sebuah parti ngatika diri iya nya Parti Sarawak Bersatu (PSB).