Pengajar patut nemu tanggungpengawa, ulih besemekih ngadaka modal mensia ti nyulut
Bala pengajar patut nemu etika gawa tauka tanggungpengawa nyadi pengajar ngambika ulih besemekih dikena ngadaka ketuai ti nyulut dudi hari ila seriris enggau misyen enggau visyen Opis Menteri Pelajar Malaysia.
Sapit Ketuai Pemesai Pelajar Pelilih Menua Tatau/Sebauh Ismawi Bujang madahka, etika ti dikemeran nya mega ulih nempa sereta nyapai sekula ti nyulut lalu nemu sereta mekuh ngagai tanggungpengawa nyadi siku pengajar.
“Ngagai pemesai di PPD Tatau/Sebauh, sida orang ti ngembing enggau ngiring nengah kerejasama raban sekula dalam ngubah pemansang pelajar ba kededua pelilih tu,” ku iya bejaku bejadika ‘Eksplorasi Inovasi: Suatu Destinasi Ke Arah Transformasi Sekolah Gemilang’ ke diatur Sekula Primari (SK) Kuala Tatau ba sekula nya kemari.
Ismawi madahka, seriris enggau rambai jaku PPD Tatau/Sebauh iya nya ‘Memperkasa Pendidikan, Melestarikan Kemenjadian Murid’ nyadi bala pengajar patut nemu tanggungpengawa sida ngambi ulih nyapai juluk falsafah menua enggau naydi pengajar ti nyulut ke ulih nempa modal mensia ti mujur ba jalai pengajap, bansa enggau menua.
Berebak enggau nya, Kepala Pengajar SK Kuala Tatau ke mega chairman program nya, Ibrahim Setok madahka, program nya dikena bekunsi penemu enggau pengajar biak ngambi lebih besemekih dalam ngenegapka diri nyadi ketuai jemah ila.
Kelimpah ari nya ku iya, nengah pengawa bekunsi tu mega dikearap mantu sekula ulih nyadi sekula ke nyulut kelebih agi sekula ti bisi dalam program Transformasyen Sekula 2025 (TS25).
Fasilitator ke meri licha dalam program tu iya nya Sapit PPD Sektor Pelajar PPD Dalat Donny Dahlan.
Sama bisi datai pemesai PPD Tatau/Sebauh Madelene Bilong, Kepala Pengajar SK Kelawit Janudin Ab Rahman, Junit Jimbau dari SK Sungai Bagiau, Mohd Farhan Abdullah (SK KUala Annau, Talang Assun (SK Sungai Sebungan) sereta 60 iku pengajar ari sekula primari pelilih Tatau enggau Sebauh.