Wong besemaya deka mai pemansang ngagai sitak Dudong enti menang maya PRN12
SIBU: Chairman Parti Se’Ati Rayat Sarawak (SUPP) Pampang Dudong Wong Ching Yong besemaya deka mai baru pemansang ba Kunsil Nengeri (DUN) Dudong ti tejanggal nyau deka 10 taun ke udah, enti sida diberi mandat ari bala pengundi ba sitak nya maya Pengawa Bepilih Nengeri (PRN) tu ila.
Nitih ku Wong, pengudah ex-Kaban Kunsil Nengeri (ADUN) Dudong Datuk Dr Soon Choon Teck bepinchin kena taun 2011, kandang bagi menua Dudong nyau enda dijaga manah ari orang ti nganti.
“Aku begulai enggau raban ketuai bansa ba sitak Dudong udah bejalai ngabas ngagai mayuh bengkah rumah panjai, bepun ari Salim ke Naman, Batu Wong, Ulu Sungai Sengan enggau Ulu Sungai Menyan.
“Lebuh ba pengawa nya, dia aku tetemuka mayuh penanggul baka nadai bekal elekterik, nadai bekal ai, jalai alun ke udah balat rusak, rumah panjai ti udah repuk lalu patut diaduka baru, palan ti kelalu baruh sereta ditiki ai di Batu 10 nyentuk Batu 14, ba Jalai KJD.
“Mayuh ari bala sida datai ngagai aku minta bantu. Aku chukup gaga ati laban ulih mantu kita semua. Tang, aku ukai pengari rayat Dudong nya kebuah bantu aku nyau betekat.
“Saut dikena mutarka semua penanggul tu iya nya ngembuan ADUN di Dudong ti udah tentu ari SUPP - GPS (Gabungan Parti Sarawak),” ku iya.
Iya madah munyi nya lebuh bejaku ba program nyuaka surat Pemendar Minta Pinjau Barang Perengka Dikena Ngaga Rumah Panjai ari baruh Opis Menteri Kaunsil Kandang Menua enggau Pengawa Berumah nengah Opis Pemansang Pengawa Berumah (HDC) ngagai Rumah Jackson Jelan, Batu 16 Jalai Oya Sibu ba sebuah hotel ti tebilang di Sibu, empai lama.
Nya alai, Wong ke mega Sapit Chairman Opis Pelilih Menua Pesisir Sibu (SRDC) madahka iya siku aja pengari ti dilanggur SUPP Dudong enggau indu parti dikena nyadi chalun ari SUPP ngambika bediri minta pilih ba sitak nya.
Berebak enggau nya, iya besemaya deka ngungkupka RM2 juta ninting taun ungkup semua rumah panjai kena nyeruri rumah ke udah lama nengah belanja sepenyampau RM7 juta ari perintah Sarawak tetiap taun.
Ku Wong, iya deka numbuhka komiti pengawa ngadu enggau ngemaru ti betuaika ex-penghulu Paing Tawi dikena ngatur proses peminta nya.
Ku iya nambah, enti belanja projek Transformasyen Menua Pesisir (RTP) enda chukup, iya deka mantu rumah panjai minta pinjau nya ari Opis Menteri Kaunsil Menua enggau Pengawa Berumah.
“Aku mega deka ngagihka RM500 nyentuk RM1000 ungkup tetiap pintu ninting taun.
“Tu semaya aku. Aku besumpah deka ngamatka semua semaya nya.
“Enggau penetap, aku mesti menang maya PRN ti deka datai. Enti aku alah, semua semaya nya deka nyadi kusung. Nya alai, kita semua patut mantu sereta nyukung aku enggau penuh ngambika aku ulih menang,” ku iya nyemetak.
Sama bisi datai iya nya Chairman SRDC Sempurai Petrus Ngelai, Penyanding Penemu SUPP Dudong Datuk Dr Soon Choon Teck, Sapit Chairman SUPP Pampang Dudong Kelvin Kong, Tuai Rumah Jackson Jelan, ex penghulu Paing Tawi enggau bala ke bukai.