Pengemeran industri asil pengelandik jari diperansang ngena teknologi digital ngelakuka produk dagang
SELANGAU: Raban pengemeran industri krafjari di Sekuau ditu diperansang ngemeranka perengkaguna transformasyen digital dikena ngelakuka produk dagang sida ngagai dagang luar, taja pan bepun ari dagang ke mit.
Pemesai Pengereja Pengawa Sarawak (SAO) Opis Pelilih Menua Selangau, Siti Zaharah Mohamad Mohmood madahka nengah ngena teknologi kemaya hari tu, raban dagang nya ulih ngelakuka produk sida nyentuk ngagai makit entarabansa.
“Kitai ulih ngena internet dikena ngelakuka produk nengah pengawa dagang dalam ‘online’ enti dibanding enggau ngena chara ke lama.
“Tu seriris enggau juluk ati Kepala Menteri Datuk Patinggi Abang Johari Tun Openg, ngambika rayat ulih nyungkak pun penatai pemisi diri nengah ekonomi digital,” ku iya.
Siti madah munyi nya lebuh ngenataika jaku ngarika Pemesai Opis Pelilih Menua Selangau, Inting Nyami bejadika Program Nutup Woksyop Krafjari Ngaga Tangu Moden enggau Sugu Tinggi ba Dewan Penghulu Balang Skim Sekuau ditu, kilah ensanus.
Sama bisi datai iya nya Penghulu Andrewson Ngalai Asom, Exco Raban Nembiak Parti Rakyat Sarawak (PRS) enggau Chairman Serakup Pemansang Kandang Batang Oya-Pakoh enggau Sekuau, Kunsilor Henry Kanyan Vincent Rawing sereta Ketuai Exco Raban Indu MJKKK Sekuau Pakoh, Dami Dingun.
Nangkanka nya, Siti mega dekaka kandang bagi menua Sekuau tu nyadi palan pengeluar asil krafjari di pelilih menua Selangau.
Woksyop tu diatur Exco Raban Indu Kaunsil Komiti Pemansang enggau Pengelikun Genturung Pendiau (MJKKK) Sekuau Pakoh.
Urung 50 iku pesereta enggau ngulu woksyop ngaga Tangu Moden lalu 40 iku ngaga Sugu Tinggi.