GPS dikeandal ulih menang ba PRN12 ngambika terus megai perintah Sarawak
SIBU: Gabungan Parti Sarawak (GPS) dikeandal ulih menang ba Pengawa Bepilih Nengeri Ke-12 (PRN12), lalu ulih terus megai perintah Sarawak, ku Sapit Chairman Parti Se’Ati Rayat Sarawak (SUPP) Pampang Dudong Kelvin Kong.
Ku iya, nadai siku ulih nulak penyulut GPS nya laban ngembuan sukung ke tegap ari rayat.
“Nadai siku ulih nulak penyulut kitai ba PRN ti deka datai, tu endang amat (nyata) ti enda ulih disangkal.
“Nyadi tanya diatu, berapa kerusi ti ulih endur kitai menang...dikena numbuhka perintah, nadai pengakang ati agi,” ku iya dalam siti program ti dipejalaika ba Sibu, empai lama.
Nitih ku Kong, lebuh bepilih enggau Pengawa Bepilih Besai Ke-14 (PRU14) ke suba ba Parlimen Lanang, iya udah bulih sukung ti tegap ari peranak menua pesisir.
Ku iya nambah, 65 nyentuk 70 peratus peranak menua pesisir kelebih agi nembiak redak ba rumah panjai nyukung iya maya nya, nyadi chalun SUPP ari Barisan Nasional (BN).
Berebak enggau nya, ungkup PRN ti deka datai, iya ngansak peranak ba kandang bagi menua Dudong meri sukung ngagai Chairman SUPP Pampang Dudong Wong Ching Yong, nyadi chalun sereta ulih menang ba kerusi nya.
“Enti nadai Dudong tauka nadai pengari rayat Dudong ari GPS, nama pekara ti udah disemaya deka nyadi kusung. Kami enda ulih ngintu nasib rayat ba menua pesisir enggau manah.
“Aku pechaya, ari baruh pegai Wong, iya ulih meri tulung ngagai rayat ba kandang Dudong ungkup lima taun ti deka datai. Bela beserakup ati mih kitai sereta ngiyarka saru penemu ti kala nyadi suba,” ku iya.
Ku Kong mega, kandang bagi menua Dudong jauh tinggal ari pemansang kenyau ba taun2011pengudahex-Kaban Kunsil Nengeri (ADUN) Dudong Datuk Dr Soon Choon Teck bepinchin.
“Ari baruh pegai Kepala Menteri Datuk Patinggi Abang Johari Tun Openg, aku andalka Sarawak deka majak mansang enggau tegap sereta manah dalam kandang lima taun ti deka datai.
“Nya alai, kitai patut nentuka kerusi Dudong pulai ngagai GPS ngambika pemansang ulih dibai ngagai bagi menua tu,” ku iya.