GPS fokus ngenanka hak Sarawak ari baruh MA63
Nya kebuah rayat Sarawak patut majak beserakup lalu anang ngelakka orang luar mambarka penyerakup ke bisi diatu
KUCHING: Perintah Gabungan Parti Sarawak (GPS) deka majak fokus negi sereta ngambi pulai hak enggau autonomi nengeri tu.
Menteri Kaunsil Kandang Menua enggau Pengawa Berumah, Dato Sri Dr Sim Kui Hian madah pengudah 55 taun, GPS pengujung iya ulih ngelepaska diri lalu ngatika diri dalam gempung nasional, ti beguna amat ngagai Sarawak kena nyapai agenda ‘Utamakan Sarawak’ (Sarawak First).
“Mayuh (parti) bukai ke semina bisi dipeda maya pengawa bepilih ke mai semaya, baka ke sebedau tu besemaya) sentang royalti minyak 20 peratus, bantu RM2,000 ungkup rayat Sarawak sereta nadai Duit Jali Tabung Pelajar Tinggi Nasional (PTPTN),” ku iya nengah utai ke ditulis sereta dibantaika ba Facebook rasmi iya kena Hari Satu.
Nya alai ku iya, GPS deka majak fokus ngenanka hak Sarawak nitihka dalam Sempekat Malaysia 1963 (MA63).
“Kami deka majak ngemansangka Sarawak. Entara nya nengah infrastruktur baka jalai alun, Transit
Aliran Autonomi (ART), bekal ai enggau elekterik,” ku iya.
Iya mega madah, bajet Sarawak udah manggai RM10 bilion ti keterubah endar taun siti nyin tadi, lalu dalam kandang beberapa taun ti deka datai deka majak balat ngerembai.
“Uji peragam ba ati manggai ba taun 2025, tau enda ibuh agi ngemansutka belanja besai ungkup infrastruktur...ke pemadu manah ari Sarawak ungkup jemah ila,” ku iya.
Ku iya baru, entara agenda ‘Utamakan Sarawak’ ke bukai iya nya, besaumka pengaya sereta pengelantang Sarawak enggau bala rayat.
“Ungkup ke pengelikun Sarawak, kami deka majak numbuhka tim penyaga pantai enggau garis entara menua sereta ngemayuhka agi nya,” ku iya.
Ku iya, nya alai rayat Sarawak patut majak beserakup lalu anang ngelakka orang luar mambarka penyerakup tu.
“Nadai utai ulih nagang Sarawak ngasaika pengelantang enggau pemaik nya dalam timpuh sepuluh taun ke deka datai, semadi mih enti peranak Sarawak enda beserakup.
“Peda Semenanjung Malaysia, maya sida ‘pambar’ (enda beserakup) sida begunaka Sarawak. Nyema Sarawak ‘pambar’, kitai deka nyadi baka sida, lalu kitai deka begunaka Semenanjung Malaysia,“ku iya.
Mayuh (parti) bukai ke semina bisi dipeda maya pengawa bepilih ke mai semaya, baka ke sebedau tu besemaya sentang royalti minyak 20 peratus, bantu RM2,000 ungkup rayat Sarawak sereta nadai Duit Jali Tabung Pelajar Tinggi Nasional (PTPTN).
Dato Sri Dr Sim Kui Hian
Menteri Kaunsil Kandang Menua enggau Pengawa Berumah